ئەمڕۆ نرخی هەر سێ جۆرەکەی بەنزین و غاز دادەبەزێت

SNN

وتەبیژی بەنزیخانەكانی شاری سلێمانی ئاماژە بەوەدەكات، لە دوا نیوەڕۆی ئەمڕۆوە هەرسێ‌ جۆرە جیاوازەكەی بەنزین لە بەنزینخانەكانی سلێمانی دادەبەزن، بەجۆرێك سۆپەر و موحەسەن 50 دینار لە نرخەكەی دادەبەزێت بەهەمان كوالیتی پێشووتریان.

ئەمژڕۆ یەکشەممە 7ی نیسانی 2024، بەهمەن قادر، وتەبێژی بەنزینخانەكانی شاری سلێمانی بەSNNی ڕاگەیاند: ئەمرۆ جارێكی دیكە نرخی بەنزین لە بەنزینخانەكانی شاری سلێمانی دادەبەزێت و لە دوانیوەڕۆی ئەمڕۆوە ئەو نرخانە كاریان پێدەكرێت.

ئاماژەی بەوەشكرد، دابەزاندنی نرخی بەنزین هەرسێ جۆری نۆرماڵ و موحەسەن و سۆپەر دەگرێتەوە لەگەڵ غازدا، بە جۆرێک موحەسەن و سوپەر 50 دینار دادەبەزێت و نۆرماڵ 25 دینار و غاز 25 دینار دادەبەزن.

وتەبێژی بەنزینخانەكانی سلێمانی ئەوەشی خستەڕوو، تا ئەمڕۆ نرخی لیترێك بەنزینی نۆرماڵ 825 دینارە بووە بەڵام لە دوانیوەڕۆی ئەمڕۆوە دەبێتە 800 دینار و موحەسەنیش لە هەزار و 50 دینارەوە دەبێتە هەزار دینار و سۆپەریش لە هەزار و 200 دینارەوە دەبێتە هەزار و 150 دینار، هاوکات غازیش لە 575 دینارەوە دەبێت بە 550 دینار.