ئەوقافی سلێمانی چاودێری بینینی مانگ ناکات بۆ دیاریکردنی جەژنی رەمەزان
SNN-
بەڕێوەبەری گشتیی ئەوقاف و کاروباری ئاینیی سلێمانی رایگەیاند، ئەو ئامێرەی مانگی پێدەبینرێت ئێمە نیمانە، لەبەرئەوە ناتوانین بچینە گڵەزەردە و شاخی ئەزمڕ و چاودێری بینینی مانگ بکەین، بۆیە داوا لە هاووڵاتییان دەکەین گەر مانگیان بینی ئاگادارمان بکەنەوە.
هاوژین رەئوف، بەڕێوەبەری گشتیی ئەوقاف و کاروباری ئاینیی سلێمانی بە SNN-ی راگەیاند: ئێوارەی ئەمڕۆ دووشەممە لیژنەی باڵای بینینی مانگ بڕیار لەسەر دیاریکردنی یەکەم رۆژی جەژنی رەمەزان دەدات، ئەوانیش وەک ئەوقافی سلێمانی چاودێری بینینی مانگ ناکەن، تەنها چاوەڕوانی پەیوەندی هاووڵاتییانن تاوەکو پێیان رابگەیەنن کە مانگیان بینیوە یاخود نا.
دەشڵێت:”خەڵکی لە شار و شارۆچکەکانی وەک شارەزوور،چەمچەماڵ، شارباژێر و ناو شاری سلێمانیش گەر مانگیان بینی ئاگادارمان دەکەنەوە و داوا لە هاووڵاتییانیش دەکەین کە مانگیان بینی لە هەرشوێنێک بوو ئاگادارمان بکەنەوە”.
سەبارەت بەوەی کە ئایا بۆچی خۆیان چاودێری بینینی مانگ ناکەن وتیشی: ئێمە ئەو ئامێرەمان نییە کە چاودێری بینینی مانگی پێدەکرێت، پێشتریش یەک دووساڵ کە کردوومانە هی کەسێک بووە لە ئاسەواری سلێمانی لە رێگەی ئەوە توانیومانە چاودێری بکەین، چونکە ئەو ئامێرە تێچووی زۆری دەوێت”.
