“نامانەوێت ببینە لایەنێک لە ململانێکانی ئێران و ئەمریکا”

SNN

سەرۆکوەزیرانی عێراق لە سەروبەندی سەردانەکەی بۆ ئەمریکا لە وتارێکدا رایگەیاند، نایانەوێت ببنە لایەنێک لە ناکۆکی و ململانێکانی تاران و واشنتۆن، هاوکات راشیگەیاند، پەیوەندییەکانی وڵاتەکەی و ئەمریکا کلیلی سەقامگیری رۆژهەڵاتی ناوەڕاستە.

محەمەد شیاع سودانی لە وتارێکدا کە لە ماڵپەڕی فۆرێن ئەفێرس بڵاوکراوەتەوە باسی لەوەکردووە، “دوو دەیە بەر لە ئێستا ئەمریکا یارمەتی خەڵکی عێراقیدا لە رووخاندنی رژێمی سەدام حسێن و دامەزراندنی پایەکانی سیستمێکی دیموکراتیک و ئەمەش دەرفەتی بۆ عێراقیەکان رەخساند کە بۆ یەکەم جار تامی ئازادی بکەن.

نوسیویشیەتی: لەئێستاشدا عێراق پێویستی بە جۆرێکی نوێ لەهاوبەشی و قۆناغێکی تازە لە پەیوەندی لەگەڵ ئەمریکا هەیە. هەر لەو رووەوە رایگەیاندووە: پەیوەندییەکانی وڵاتەکەی و ئەمریکا کلیلی سەقامگیری رۆژهەڵاتی ناوەڕاستە.

هەرلە وتارەکەیدا سەرۆکوەزیرانی عێراق جەختی لەوەکردووەتەوە کە نایانەوێت وڵاتەکەیان ببێتە گۆڕەپانی یەکلاکردنەوەی ململانێی و بە شێوەیەکی هاوسەنگ مامەڵە لەگەل سەرجەم وڵاتان دەکەن، هەروەک راشیگەیاندووە: خوازیاری ئەوە نین کە لە ململانێ و ناکۆکیەکانی ئێران و ئەمریکادا ببنە لایەن و دەیانەوێت خۆیان لەو ناکۆکیانە لابدەن.