ئەپیکۆر: سەر نج دەخەینە سەر دەستپێکردنەوەی بەپەلەی هەناردەی نەوتی هەرێمی کوردستان

کۆمەڵەی پیشەسازی نەوتی کوردستان- ئەپیکۆر راگەیەندراوێکی لەبارەی هەناردەی نەوتی هەرێمی کوردستان بڵاوکردەوە و رایگەیاند: سەرنج دەخەینە سەر دەستپێکردنەوەی بەپەلەی هەناردەی نەوتی هەرێمی کوردستان

کۆمەڵەی پیشەسازی نەوتی کوردستان (ئەپیکور) لە راگەیەندراوەکەیدا دەڵێت:” جەختکردنەوەى جۆ بایدن سەرۆکى ئەمەریکا و محەمەد شیاع سودانى سەرۆک وەزیرانى عێراق بۆ دەستپێکردنەوەى خێراى هەناردەى نەوت لەڕێی بۆرى نەوتى عێراق-تورکیا بەرز دەنرخێنین”.

دەشڵێت:” ئامادەن دەستبەجێ دەست بە گفتوگۆکانیان بکەن لەگەڵ بەرپرسانى حکومەتى عێراق و حکومەتى هەرێمى کوردستان تایبەت بە دەستپێکردنەوەى هەناردەى نەوت و داواى گەرەنتى پێدانى شایستە داراییەکانى ئێستا و رابردوش دەکات بەپێی رێککەوتنە فەرمییەکانیان”

هەروەها مایڵز کاگینز، وتەبێژى ئەپیکور رایگەیاندوە: ئەو کۆمپانیایانەى ئەندامن لە ئەپیکور سەرنجیان لەسەر هاوکاریکردنى هەردوو حکومەتى عێراق و هەرێمە بۆ دەستپێکردنەوەى هەناردەى نەوت لەڕێی بۆریی عێراق-تورکیا-وە بە زوترین کات.