“فراكسیۆنی یەكێتی لەبەرژەوەندی هاووڵاتیانی هەرێم ڕێگری لە پەسەندكردنی پرۆژەیاسایەك کرد”
SNN-عەلی حەمە سەعید
ئەندامێكی ئەنجومەنی نوێنەرانی عێراق لەفراكسیۆنی یەكێتی ئاماژە بەوەدەكات ئەمڕۆ پلانێك هەبوو بۆ ئەوەی لە ئەنجومەنی نوێنەرانی عێراق پرۆژەیاسای سندوقی نیشتەجێبون پەسەد بكرێت و پارێزگاكانی هەرێمی كوردستانی لێبێبەش بكرێت، بەڵام بەهەوڵی فراكسیۆنی یەكێتی توانیمان ئەو پلانە پوچەڵ بكەینەوە.
غەریب ئەحمەد، ئەندامی ئەنجومەنی نوێنەرانی عێراق لەفراكسیۆنی یەكێتی بە SNNی ڕاگەیاند: بەگوێرەی دەستوری عێراق ئەو پرۆژەیاسانەی كە لە پەرلەمانی عێراق دەردەچن و پەسەند دەكرێن دەبێت بۆ هەموو پارێزگاكانی عێراق بێت بە هەرێمی كوردستانیشەوە، بەڵام تا ئێستاش نیەتێك هەیە كە دەیەوێت هاووڵاتیانی هەرێم بێبەش بكات لەماف و ئیمتیازاتانەی كە لەبەرژەوەندی گشتیدان و لەلایەن پەرلەمانەوە پەسەند دەكرێن، بۆیە ئەمە ئەركی ئێمە پەرلەمانتارانی یەكێتییە ڕێگربین لەو هەوڵانە.
ئاماژەی بەوەشكرد، لەدانیشتنی ئەمڕۆی پەرلەمانی عێراق وەك فراكسیۆنی یەكێتی توانیمان سەركەوتووبین لەوەی هەوڵ و پلانێك هەبوو كە بۆئەوەی پرۆژەیاسای سندوقی نیشتەجێبوون پەسەند بكرێت و تێبەپەڕێندرێت، بەڵام پارێزگاكانی هەرێمی كوردستانی لێبێبەشكرابوو، بەڵام ئێمە توانیمان ئەو پلانە پوچەڵ بكەینەوە و ڕێگری لەوەبكەین پرۆژەیاسكە پەسندبكرێت.
ئەو ئەندامەی ئەنجومەنی نوێنەرانی عێراق ئەوەشی خستەڕوو، ئێمە لە فراكسیۆنی یەكێتی ئەوەمان بەدەستەی سەرۆكایەتی پەرلەمانی عێراق ڕاگەیاندووە كە دەستورو یاسای عیراقی دەبێت گشتگیربێت و هەموو پارێزگاكانی عیراق بگرێتەوە، بۆیە چاوەڕێین تا لە ڕۆژانی داهاتوو گۆڕانكاری لە بڕگەومادەكانی پرۆژەیاكە دەكرێت و پارێزگاكانی هەرێمی كوردستانیش دەگرێتەوە پاشان دەنگی پێدەدرێت.
