“دواخستنی هەڵبژاردن لەدەستی هیچ حزبێكدا نییە، سەرۆكایەتی هەرێم وكۆمیسیۆن دەتوانن ئەو بڕیارە بدەن”

SNN-عەلی حەمە سەعید

ئەندامێكی سەركردایەتی یەكێتی نیشتمانی كوردستان ئاماژە بەوەدەكات ئەو لایەنەی رۆژانە هەواڵی ئەوە بڵاودەكەنەوە كە گوایە یەكێتی و پارتی لەسەر دواخستنی هەڵبژاردنەكان رێكەوتوون، تەنها وەكو بانگەشەیێكی پێشوەختەیە و دەیەوێ شەڕێكی دەرونیی لەگەڵ ئەندامان و دەنگدەرانی یەكێتی بكات، چونكە دواخستنی هەڵبژاردن لەدەستی هیچ حزبێكدا نیە بەڵكوو لەدەستی سەرۆكایەتی هەرێم و كۆمیسیۆندایە.

لەتیف نێروەیی، ئەندامی سەركردایەتیی یەكێتیی نیتشمانیی كوردستان بە SNNی ڕاگەیاند: بریاری دیاریكردنی رۆژی هەڵبژاردن، یان بڕیاردان لەسەر دواخستنی وادەی هەڵبژاردنەكان بەدەست هیچ حزبێك نییە بۆئەوەی رێكەوتن بكات بۆ دواخستنی هنەڵبژاردن، بەڵكو ئەو پرسە پەیوەستە بە سەرۆكی هەرێم و كۆمسیۆنی باڵای سەربەخۆی هەڵبژاردنەكانەوە، بۆیە ئەو لایەنانەی رۆژانە هەواڵی ناراست بڵاودەكاتەوە گوایە یەكێتی وپارتی لەسەر دواخستنی هەڵبژاردنەكان رێكەوتوون،  تەنها وەكو بانگەشەیێكی پێشوەختەیەو دەیانەوێت شەرٍێكی دەرونی لەگەڵ ئەندامان و دەنگدەرانی یەكێتی بکەن.

ئاماژەی بەوەشكرد، ئەو لایەنەی كە بانگەشەی ئەو هەواڵە ناڕاستانە دەكات بۆخۆیان ژێربەژێر هاوشێوەی پارتی  هەوڵی دواخستنی هەڵبژاردن دەدات، بەڵام بەئاشكراو لەرێی میدیاوە پەیامێكی پێچەوانە ئاراستەدەكات، چونكە  دروست بوونی چەند هاوپەیمانی و  گرووپ و خۆكاندیدكردنی كەسایەتی سەربەخۆ كە هەموویان لەسەر دەنگی ناڕازیی كاردەكەن، بۆ ئەولایەنە سوپرایزێكی دڵخۆشكەرانە نییە، بۆیە دەیەوێ دەستە چەورەكەی بەلایەنێكی دیكەوە بسرێتەوە.

ئەو ئەندامەی سەركردایەتی یەكێتی ئەوەشی خستەڕوو، یەكێتی نیشتمانیی كوردستان پەیامێكی شەفافی هەیە و لەگەڵ ئەنجامدانی هەڵبژاردنێكی پاك و بێگەرد دایە و نایەوێ‌ هەڵبژاردنی پەرلەمانی كوردستان دوابخرێت، چونكە دواخستنی هەڵبژاردن لە بەرژەوەندی  هەرێمی كوردستان  و پرۆسەی دیموكراتی و سەقامگیریی سیاسی و مانەوەی قەوارەی هەرێمدا نییە، هاوكات سەرپەرشتیكردنی پرۆسەی هەڵبژاردن و پاراستنی سندوقەكان پەیوەندی بە ئێمەوە نیە، بەڵكو پەیوەندی بە كۆمسیۆنی باڵای سەربەخۆی هەڵبژارنەكانی عێراقەوە هەیە و كۆمسیۆنیش سەر بە حكومەتی فیدراڵە و هەر كێشە و گرفتێك لەو بوارەدا هەبێت كۆمسیۆن لێی بەرپرسیار دەبێت.