بە هەوڵی قوباد تاڵەبانی كاركردن لە ڕێگای كەلار- سلێمانی دەستپێدەكاتەوە

SNN-عەلی حەمە سەعید

دوای ئەوەی زیاد لە مانگێكە بەهۆی خەرجنەكردنی پارە كاركردن لە رێگەی كەلار – سلێمانی راگیراوە، بەڵام بڕیارە لەهەفتەی داهاتووەوە كاركردن لەو ڕێگایە دەستپێبكاتەوە، ئەوەش دوای سەردانەكەی قوباد تالەبانی دێت بۆ گەرمیان و بەڵێنی بە كۆمپانیای جێبەجێكارداوە كە لایەنە پەیوەندیدارەكان ڕادەسپێرێت بۆ دابینكردنی پارەی پێویست بۆ دەستكردنەوە بە پرۆژەكە.

عوسمان حەمەسەعید، خاوەنی كۆمپانیای بێشكان كە جێبەجێكاری پرۆژەی ڕێگای سەرەكی كەلار سلێمانییە بە SNNی راگەیاند: بەهۆی دابینەكردنی پارە بۆ تەواوكردنی پڕۆژەی ڕێگای سەرەكی كەلار سلێمانی ماوەی زیاد لە مانگێكە كاركردن لەو پرۆژەیە ڕاگیراوە، هاوكات پێشتریش وەك پێویست پارە بۆ پرۆژەكە خەرجنەدەكرا بۆیە كاركردن لە پرۆژەكە بەخاوی بەڕێوەدەچوو، هەرئەوەش وایكردووە كە نەتواندرێت ئەو پرۆژەیە لەكاتی خۆیدا تەواو بكرێت كە لەئێستادا لە%70ی تەواوكراوە.

ئاماژەی بەوەشكرد، لەدوای سەردانەكەی قوباد تاڵەبانی، جێگری سەرۆكی حكومەتی هەرێم بۆگەرمیان سەردانی پڕۆژەكەی كرد و بەڵێنی ئەوەی پێداین كە لایەنی پەیوەندیدار ئاگاداربكاتەوە كە پارەی پێویست بۆ پڕۆژەكە خەرج بكرێت و لە ئایندەیەكی نزیكدا پرۆژەكە تەواو بكرێت.

خاوەنی كۆمپانیای جێبەجێكاری پرۆژەكە ئەوەشی خستەڕوو، وابڕیارە كە لە هەفتەی داهاتووەوە كاركردن لەو پرۆژەكە دەستپێبكاتەوە، كە تائێستا بەبڕی 97 ملیار دینار كاریان كردووە وبەڵام تائێستا بڕی 82 ملیار دیناریان بۆ خەرجكراوە.