وتەبێژی كۆمیسیۆن لە SNNەوە وادەی دەستپێكردن و کۆتاییهاتنی بانگەشەی هەڵبژاردنی پەرلەمانی كوردستانی دیاریكرد

SNN-عەلی حەمە سەعید

وتەبێژی كۆمیسیۆنی باڵای سەربەخۆی هەڵبژاردنەكانی عێراق ئاماژە بەوەدەكات، ئەو خشتەی كارەی دامانناوە بۆ بانگەشەكردنی بەربژێرو لیستەجیاوازەكان لە 10/5/2024 ەوە دەستدەكرێت بە بانگەشەی هەڵبژاردن و لە 6/6/2024 كۆتایی بە بانگەشەی هەڵبژاردن دێت.

جومانە غەلای، وتەبێژی كۆمیسیۆنی باڵای سەربەخۆی هەڵبژاردنەكانی عێراق بە SNNی ڕاگەیاند: بەگوێرەی خشتەی كاری كۆمیسیۆن دەستپێكری بانگەشەی هەڵبژاردن بۆ بەربژێرانی سەربەخۆ و هاوپەیمانی لایەنە سیاسییەكان و قەوارە سیاسییەكان لە 10/5/2024 دەستپێدەكات.

ئاماژەی بەوەشكرد، بانگەشەی هەڵبژاردن تا ڕۆژی 5/6/2024 بەردەوامی دەبێت و لە بەرواری 6/6/2024 كۆتایی بە بانگەشەی كاندیدە سەربەخۆكان و هاوپەیمانی و قەوارە سیاسیەكان دێت.

وتەبێژەكەی كۆمیسیۆنی باڵای سەربەخۆی هەڵبژاردنەكان ئەوەشی خستەڕوو، بڕیاردان لەسەر گۆڕانكاری لە وادەی دەستپێكردنی بانگەشە و كۆتایی هاتنی بانگەشەكردن لەدەستەڵاتی ئەنجومەنی كۆمیسیاراندایە و تەنها ئەوان دەتوانن گۆڕانكاری لەو وادەیەدا بكەن.