بەشەخۆراك دابەشدەكرێت وگۆرانكاریش لەبڕی چەند مادەیەكی خۆراكی كراوە

SNN-عەلی حەمە سەعید

بەڕێوەبەری گشتی بازرگانی لەوەزارەتی بازرگانی و پیشەسازی حكومەتی هەرێم ئاماژە بەوەدەكات لە سبەینێوە دەستدەكرێت بە دابەشكردنی بەشەخۆراكی مانگی ئازاری ئەمساڵ و هاوكات هەندێك لەمادەخۆراكییەكانی مانگی نیسانیش گەیشتووەتە كۆگانمان، ئاشكراشیدەكات كە گۆڕانكاری لە بڕی بڕنج و هەروەها دۆشاوی تەماتە كراوە.

نەوزاد شێخ كامیل، بەڕێوەبەری گشتی بازرگانی لەوەزارەتی بازرگانی و پیشەسازی حكومەتی هەرێم بە SNNی ڕاگەیاند: دابەشكردنی بەشەخۆراكی مانگانەی هاووڵاتیان بەردەوامی هەیە و لەسبەینێوە دەستدەكەین بەدابەشكردنی بەشەخۆراكی مانگی ئازاری ئەمساڵی هاووڵاتیان، بۆ ئەومەبەستەش سەرەتا بریكارەكانی دەرەوەی شار دەستدەكەن بە دابەشكردنی مادەكانی خۆراك بەسەر هاووڵاتیاندا پاشان لەسەنتەری شارەكانیش دابەشدەكرێت.

ئاماژەی بەوەشكرد، چەند ڕۆژێكە دەستكراوە بە دابەشكردنی بەشە ئاردی مانگانە هاوكات، لەئێستادا بەشێك لەمادەخۆراكییەكانی مانگەكانی نیسان و ئایار گەیشتووەتە كۆگاكانمان و هیچ گرفتێك نییە بۆ دابەشنەكردنی بەشەخۆراكی مانگانەی هاووڵاتیان ئەوەش كاریگەری باشی هەبووە لەڕێگریكردن لەبەرزبوونەوەی نرخی ئەو ماددەخۆراكیانە لەبازاڕەكاندا.

ئەو بەرپرسەی وەزارەتی بازرگانی و پیشەسازی حكومەتی هەرێم ئەوەشی خستەڕوو، بۆ ئەم مانگە گۆڕانكاریی لە بڕی چەند مادەیەك كراوە بەنمونە برنج لەبری سێ كیلۆ بۆ هەر كەسێك دوو كیلۆ و نیو دابەشدەكرێت هاوكات دۆشاوی تەماتەش لەبری ئەوەی هەر كەسێك 400 گرمی پێبدرێت 800 گرامی پێدەدرێت بەڵام ئەو دۆشاوە بەشی دوومانگە واتە لەمانگی داهاتوو دۆشاو دابەشناكرێت، ئەو گۆڕأنكارییەش لەلایەن وەزارەتی بازرگانی عێراقەوە بڕیاری لەبارەوە دراوە.