“وردبینی لە لیستی وانەبێژان لە بەغداد لە كۆتا قۆناغدایە”

SNN-

نوێنەری وانەبێژانی هەرێم زانیاری نوێ لەبارەی ناردنی ناوەکانیان بۆ بەغدا و گرێبەستەکانیان ئاشكرا دەکات و دەڵێت:” وردبینی زیاتر لە 37 هەزار مامۆستای وانەبێژ لە وەزارەتی دارایی عێراق لە قۆناغی كۆتاییدایە، بۆ ئەوەی بەشێوەی گرێبەست دابمەزرێن.

عەلی رەئوف، نوێنەری وانەبێژانی ھەرێم روونکردنەوەیەکی بڵاوکردووەتەوە و ئاماژەی بەوەکردووە: بەدواداچوونیان كردووە بۆ یەكلاییكردنەوەی دۆسیەی وانەبێژان لە بەغداد و لەم كاتەشدا وردبینی لە لیستی وانەبێژان لە كۆتایی پڕۆسەكەدایە لە لایەن دیوانی چاودێری عێراق.

دەشڵێت:”مامۆستایانی وانەبێژ كە ژمارەیان 37 هەزار و 700 مامۆستایە بۆ دامەزراندنیان مانگانە دوو ملیار و 700 ملیۆن دیناریان پێویستە، بڕیاریشە دوای وردبینی، ناوەكانیان ئاڕاستەی ئەنجومەنی راژەی فیدراڵی عێراق دەكرێت بۆ دامەزراندنیان”.

راشیگەیاندووە، ئەگەر دیوانی چاودێری لیستەكە پەسەندبكات، وانەبێژان دەبن بەگرێبەست و راستەخۆ مووچەكانیان لەلایەن وەزارەتی دارایی عێراقەوە خەرجدەكرێت