وەزیری دەرەوەی ئەمریكا: بڕیارمانداوە بگەینە ئاگربەست لە كەرتی غەززە
لە پێنجەمین ڕۆژی هێرشەکاندا بۆ سەر کەرتی غەززەی گەمارۆدراو، سوپای ئیسرائیل بەردەوامە لەسەر هێرشەکانی و لە ئاکامی هێرش بۆ سەر ناوچەی شێخ ریزوان، خانووی فۆتۆگرافەری ئاژانسی ئانادۆڵو، عەلی جەدەڵلا ڕووخا. جەدەڵڵا دەستی براکەی ماچ کرد کە لە هێرشەکەدا گیانی لەدەستدا. ( Mustafa Hassona - ئاژانسی ئانادۆڵو )
SNN
وەزیری دەرەوەی ئەمریکا لە بارەی ئاگربەست لە غەززە رایگەیاند، بڕیاریانداوە بگەنە ئاگربەستێک لەنێوان حەماس و ئیسرائیل، بە جۆرێک بارمتەکان بگەڕێینەوە بۆ لای کەسوکاریان.
ئەمڕۆ چوارشەممە 1ی ئایار، ئەنتۆنی بلینكن وەزیری دەرەوەی ئەمریكا لە میانی سەردانەكەی بۆ تەلئەبیب و كۆبوونەوەی لەگەڵ سەرۆكی ئیسرائیل رایگەیاند، تەنانەت لەمكاتە سەختەدا، بڕیاریانداوە بگەنە ئاگربەستێك لەنێوان حەماس و ئیسرائیل كە بارمتەكان بگەڕێنێتەوە سەر ماڵ و حاڵی خۆیان، وتیشی حەماس هۆكاری نەگەیشتنە بە ئاگربەست.
ئاماژەی بەوەکردووە لەگەڵ ناتانیاهۆ گفتوگۆ دەكەن سەبارەت بەوەی كە ئیسرائیل پێویستی بە گرتنەبەری چ ڕێوشوێنێك هەیە بۆ زیادكردنی هاوكارییە مرۆییەكان بۆ كەرتی غەززە كە بڕیارە ئەمڕۆ چاویان بەیەكتر بكەوێت.
ماوەیەکی زۆرە ئەمریکا بووەتە نێوەندگیر لە نێوان حەماس و ئیسرائیل، بۆ ئەوەی ئاگربەست لە نێوانیاندا رابگەیەنن و بارمتەکانی نێوان هەردوولا ئازاد بکرێن و هاوکارییەکانیش بگەیەنرێتە کەرتی غەززە، بەڵام تاکو ئێستا هەر یەکە لە حەماس و ئیسرائیل بەهۆی مەرجەکانیانەوە رێکنەکەوتوون و یەکتریش تۆمەتبار دەکەن کە هۆکار بۆ دواخستنی ئاگربەست.
