کەشناسێک رایدەگەیەنێت ئەمڕۆ تاوەباران و هەورە بروسکە دەبێت

SNN

شارەزایەکی کەشناسی سەبارەت بە کەشی ئەمڕۆ رایگەیاند، لە ناوچەکانی بادینان و سنوری هەولێر تاوەبارانی بەهێز و هەورە بروسکە دەبێت، دواتر ناوچەکانی سنوری پارێزگای سلێمانی و هەڵەبجە دەگرێتەوە.

ئەمڕۆ یەکشەممە 5ی ئایار، شاڵاو هیدایەت، شارەزای کەشناسی رایگەیاندووە، پێشبینی دەکرێت بەهۆی هاتنی هەور لە تورکیا و دروستبوونی هەوری ناوخۆیی، ئەمرۆ یەکشەممە تاوە باران و هەوره بروسکە دەست پێبکاتەوە، سەرەتاش لەناوچەکانی بادینانەوە دەبێت و دواتر بۆ سنوری هەولێر و کۆیە و ئیدارەی ڕاپەرین، دواتر ناوچە جیاوازه کانی سنوری پارێزگای سلێمانی و هەڵەبجە و دەوروبەریان دەگرێتەوە، ئەگەری هەیە بەشێکی ناوچەکانی گەرمیانیش بگرێتەوە.

ئاماژەی بەوەکردووە، چەقی کاریگەریی ئەم حاڵەتە بەزۆری کاتەکانی نیوەڕۆ و دوانیوەڕۆ بۆ کاتەکانی مەغریب دەبێت، لە بەشێک شوێن ئەگەری تاوە بارانی بەهێز هەیە لەگەڵ ڕودانی هەوره بروسکە و تەرزە و تەرزەی قەبارە گەورەش ئەگەری کراوەیە بۆ هەندێک شوێنی دیاری نەکراو.

هاوکات لەکاتی تاوەکاندا خێرایی با زیاد دەکات، ئەگەری بەرزبوونەوەی ئاستی ئاو هەیه لەهەندێک شوێن و دروست بوونی لافاو لەهەندێک شوێن ئەگەرێکی کراوەیە، تایبەت ئەو شوێنانەی تاوی بەهێز دەیانگرێتەوەو مەترسیان لەسەرە.

سەبارەت بە کەشی شەوەکەی ئاشکرایکردووە، دووبارە لە درەنگانی ئەمشەوە و بۆ سبەی دووشەممە بەتایبەتی هەرێمی کوردستان دەکەوێتەوە ژێر کاریگەری نزمە پاڵە پەستۆیەکی تری بەرفراوان و چالاکی دەریای ناوەڕاست کە بارانی تر بەو هۆیەوە دەست پێدەکاتەوە،  بەشێوەی گشتگیر تا چوارشەممە کاریگەری دەمێنێتەوە ناو بەناو بۆ چوارشەممەش ئەگەری ڕێژنەی لابەلا هەیە، لەمەودای کاریگەری ئەم شەپۆلەشدا پێشبینی بارانێکی زۆر باشی لێدەکرێت، بارانی زۆریش لەو ناوچانە دەبارێت کە لە حاڵەتی پێشتر تێیدا کەمتر باری.

ئەو شارەزای کەشناسە روونیکردووەتەوە، ناوچەکانی وەک بیتوێن و پشدەر و کۆیە  پلەکانی گەرما بەڕێژەی 3  تا 4 پلە دادەبەزێتەوە، لەشاخە زۆر بەرزەکان ئەگەری بارینی بڕێک بەفر هەیە، لەگەڵ ڕوودانی هەورە بروسکەی بەهێزو ئەگەرەکانی ڕودانەوەی لافاو لەسەر بەشێک ناوچە تایبەت ئەو شوێنانەی مەترسیان لەسەرە .

دەڵێت “لە هەفتەی دواتریشدا شەپۆلێکی تری باران دەرکەوتووەتەوە، بەڵام بەهارە و گۆڕانکارییەکان خێرا ڕوودەدەن”.