هۆشدارى ده‌درێت له بڵاوبوونه‌وه‌ى مادده‌ى هۆشبه‌ر له گه‌رمیان
حه‌پى هۆشبه‌ر و خواردنه‌وه كحولیه‌كان | فۆتۆ: themeadowstexas
SNN
لێپرسراوی بەشی ماددەی هۆشبەر لە بەڕێوبەرایەتی ئاسایشی گەرمیان هۆشدارى ده‌داته بڵاوبوونه‌وه‌ى مادده‌ى هۆشبه‌ر و ده‌ڵێت: باوك هه‌یه كچه‌كه‌ى خۆى تووشى مادده‌ى هۆشبه‌ر كردووه و پاشان كارى نه‌شیاوى له‌گه‌ڵ ئه‌نجامداوه.
له‌میانى پانێڵێكى گفتوگۆدا كه له‌لایه‌ن رێكخراوى (PAO) رێكخرابوو له‌باره‌ى مادده‌ى هۆشبه‌ر، دیار محەمەد، لێپرسراوی بەشی ماددەی هۆشبەر لە بەڕێوبەرایەتی ئاسایشی گەرمیان هۆشداریدا له بڵاوبوونه‌وه‌ى به‌ربڵاوى مادده‌ى هۆشبه‌ر و وتى: “یه‌كێك له كێشه‌كانى ئێمه له ئێستادا بریتیه له‌وه‌ى كه سنوورێكى فراوانمان له‌گه‌ڵ وڵاتى ئێران هه‌یه، پاشان له سنوورى خانه‌قینیشه‌وه هاوسنوورین له‌گه‌ڵ ئێران، ئه‌مه كارگه‌ریگه‌ى راسته‌وخۆى هه‌یه له‌سه‌ر بڵاوبوونه‌وه‌ى زياترى مادده‌ى هۆشبه‌ر”.
لێپرسراوی بەشی ماددەی هۆشبەر لە بەڕێوبەرایەتی ئاسایشی گەرمیان به هێنانه‌وه‌ى نمونه‌ى زیندوو مه‌ترسیه‌كه‌ى بۆ ئاماده‌بوان خسته‌ڕوو و وتى: “باوك هه‌یه خۆى به‌كارهێنه‌رى مادده‌ى هۆشبه‌ر بووه، كچه‌كه‌شى فێر كردووه، پاشان كارى نه‌شیاوى له‌گه‌ڵ كردووه، دواى ئه‌وه كوڕه‌كه‌شى فێر كردووه. ئه‌مه كارى كردووه‌ته‌سه‌ر ئه‌و قوتابخانه‌يه‌ى كه ئه‌و دوو خوێندكاره تێیدا خوێندوویانه”.
به وته‌ى دیار محەمەد، “له ئێستادا مه‌ترسیه‌كى نوێ رووى له گه‌رمیان كردووه ئه‌ویش بریتیه له‌به‌كارهێنانى جۆرێك له قه‌تره‌ى چاو له‌كاتى دروستكردنى نێرگه‌له‌دا كه رۆڵى مادده‌ى هۆشبه‌ر ده‌بینێت و زۆر مه‌ترسیداره”.
