نوێترین لێدوانی مەسرور بارزانی لەبارەی دابەشکردنی مووچەی مانگی چوار

SNN-
مەسرور بارزانی، سەرۆکی حکومەتی هەرێمی کوردستان رایگەیاند، چاوەڕێی بەغدادین مووچەی مانگی چوار بنێرێت، وەکو هەرێم هەمو کارەکانمان جێبەجێ کردوە، دەشڵێت، نزیکەی 400 هەزار کەس لە هەرێمی کوردستان لە پرۆسەی تەوتین  تۆمارکراون.

مەسرور بارزانی، سەرۆکی حکومەتی هەرێمی کوردستان رایگەیاند: “تا ئێستا چاوەڕێین بۆ ئەوەی بەغدا بڕیاری کۆتایی بدات لەبارەی مووچەی مانگی چوار و هیوادارین مانگی پێنجیش لەکاتێکی زوودا بنێردرێت”

ئاماژەی بەوەشکرد:”ئەوەی لەسەر هەرێمی کوردستانە، هەموو داواکارییەکانی بەغدامان جێبەجێ کردووە و، بۆ ئەوەی نەبێ بەکێشە  بۆ ناردنی مووچەی خەڵکی کوردستان، ئەوەی تر لەسەر خودی حکومەتی فیدراڵی دەمێنێ، کە بۆچی ئەم دواخستنە دەکرێت، هیوادارم ئەو کاتە خەڵکەکە پرسیارەکان ئاڕاستەی حکومەتی فیدراڵی بکەن.”

سەبارەت بە بانکیکردنی مووچەی فەرمانبەران وتیشی: “نزیکەی 400 هەزار کەس لە هەرێمی کوردستان ناونووس کراون بە رێگەی بانکی بۆ ئەوەی بتوانن مووچەی خۆیان وەربگرن. ئەوەی حکومەتی هەرێم دەستیپێکردووە، دروستکردنی توانایی ئابووری بۆ هاووڵاتییانە، پێدانی هێزی ئابوورییە بە هاووڵاتییان، هەر کەسێک دژی تەوتین هەر شتێک بڵێ، دژی ئەوەیە کە هاووڵاتی خاوەنی بڕیاری خۆی بێت خاوەنی ئەکاونتی خۆی بێت و خاوەنی بڕیاری ئابووریی خۆی بێت، ئەوەی حکومەت کردوویەتی، لە بەرژەوەندیی هاووڵاتییانە.”