ئەمریکا لەبارەی رەفەحەوە پەیامێکی توند دەداتە ئیسرائیل

SNN

وەزیری دەرەوەی ئەمریکا لە پەیوەندییەکی تەلەفونیدا لەگەڵ وەزیری بەرگریی ئیسرائیل جارێکی دیکە دژایەتی وڵاتەکەی بۆ هێرشی زەمینی  تەلئەبیب بۆ سەر رەفەح دووپات کردەوە و هۆشداری دا کە دوور نییە واشنتۆن ناردنی چەک بۆ ئەو وڵاتە زیاتر رابگرێت.

ماتیۆ میلەر وتەبێژی وەزارەتی دەرەوەی ئەمریکا رایگەیاند، ئەنتۆنی بلینکن وەزیری دەرەوە لە پەیوەندییەکی تەلەفونیدا لەگەڵ یوئاڤ گالانت وەزیری بەرگریی ئیسرائیل بە راشکاوی جەختی لەسەر دژایەتی ئەمریکا بۆ ئۆپراسیۆنی سەربازی بەربڵاوی زەمینی بۆ سەر رەفەح کردووەتەوە و داواشی کردووە، بەمەبەستی گەیاندنی هاوکاری مرۆیی خاڵەکانی چوونە ژوورەوە بۆ کەرتی غەززە زیاتر بکرێن.

وەزیری دەرەوەی ئەمریکا هەڕەشەی ئەوەشی کردووە، کە لە ئەگەری دەستپێکردنی هێرشێکی زەمینی بەرفراوان بۆ سەر رەفەح دوور نییە ئیدارەی کۆشکی سپی هاوکارییە سەربازییەکانی بۆ ئیسرائیل زیاتر سنووردار بکات.

پێشتر و لە هەنگاوێکی چاوەڕواننەکراودا جۆ بایدن فەرمانی کرد بە رێگری لە ناردنی چوار هەزار بۆمب بۆ سوپای ئیسرائیل، ئەمەش کاردانەی توندی تەلئەبیب و پشتیوانانی ئەو وڵاتە لە ناوخۆی ئەمریکای لێکەوتەوە.

بلینکن لە رۆژانی رابردوودا لە چاوپێکەوتنێکدا باسی لەوەکردبوو، تاکتیکە سەربازییەکانی ئیسرائیل زیانی گیانی زۆری بە مەدەنییەکان گەیاندووە.