یەکەم هەنگاو بۆ چارەسەرکردنی کێشەکانی نێوان هەرێم و بەغدا ئاشکرا کرا

SNN-

نوێنەری حکومەتی هەرێمی کوردستان لە بەغدا راگەیاند، ئەنجومەنی وەزیرانی هەرێمی کوردستان بڕیاری رادەستکردنی داهاتە نانەوتییەکانی داوە بە حکومەتی فیدڕاڵی، دەشڵێت: بەغدا قووڵایی ستراتیژیی هەرێمی کوردستانە.

فارس عیسا، نوێنەری حکومەتی هەرێمی کوردستان لە بەغدا بە ڕۆژنامەی سەباحی ڕاگەیاند، ئەنجومەنی وەزیرانی هەرێم بڕیاری داوە داهاتە نانەوتییەکان ڕادەستی حکومەتی فیدراڵی بکات و ئەوەش یەکەم هەنگاوە بۆ چارەسەرکردنی کێشە داراییەکانی نێوان هەردوولا.

راشیگەیاندووە کە حکومەتی هەرێمی کوردستان سەرجەم داتا و لیستەکانی ڕادەستی وەزارەتە پەیوەندیدارەکانی حکومەتی فیدراڵی کردووە.

سەبارەت بە بەبانکیکردنی مووچەی فەرمانبەرانیش، فارس عیسا  دەشڵێت:” تیمێکی بانکی تی بی ئای لە هەرێمی کوردستانە بۆ هاوئاهەنگی و دەستپێکردنی بەبانکیکردنی مووچە کە هەرێمی کوردستان بەر لە بڕیارەکەی دادگای فیدراڵیش بە هاوئاهەنگی لەگەڵ بانکی ناوەندیدا دەستیپێکردووە”.

ڕوونیشیکردەوە کە مەسرور بارزانی، سەرۆکی ئەنجومەنی وەزیران جدییە لەوەی کێشەکان لە بەغدا چارەسەربکرێن نەک لە شوێنی دیکە، ئەو سەردانەکەش کە ساڵی 2019 لە دەستپێکی دەستبەکاربوونی بۆ بەغدا ئەنجامی دا پەیامی ئەوەی تێدا بوو کە بەغدا قووڵایی ستراتیژیی هەرێمی کوردستانە.