وەزارەتی دارایی عێراق مووچەی مانگی پێنجی ئەم توێژانە دابەشدەکات
SNN
وەزارەتی دارایی عێراق رایگەیاند، پارەی مووچەی مانگی ئایاری خستە سەر هەژماری بانکی فەرمانبەران و هێزە ئەمنییەکانی عێراق.
ئەمڕۆ سێشەممە 21ی ئایار، وەزارەتی دارایی عێراق رایگەیاند، ئەمڕۆ پارەی مووچەی مانگی ئایاری فەرمانبەران و هێزە ئەمنییەکان خراونەتە ناو هەژماری بانکییەوە و مووچەخۆران دەتوانن مووچەکانیان وەربگرن.
ئەمە لە کاتێکدایە، مووچەخۆرانی هەرێم بەشێکیان مووچەی مانگی نیسانیان وەرگرتووە و بەشێکی تری وەزارەتەکانی هەرێم ماون مووچە وەربگرن، بەهۆی ئەوەی هێشتا پارەکانیان لەلایەن بەغداوە نەهاتووە.
هاوکات، هەریەكە لە هێزەكانی یەكەی 70 و 80 و هێزی بەرگری و فریاكەوتن و هێزەكانی زێرەڤانی و دەزگای ئاسایش و ئەنجومەنی ئاسایش و پۆلیسی دامودەزگا نەوتییەكان تاکو ئێستا مووچەی مانگی چواریان وەرنەگرتووە.
بەگوێرەی ئەو زانیارییانەی كە لە بەرپرسێكی وەزارەتی دارایی و ئابوری حكومەتی هەرێم بە SNNدراون ئاماژە بەوەکراوە، وەزارەتی دارایی عێراق هۆکاری نەناردنی پارەی ئەو هێزانەی بۆ ئەوە گەڕاندووەتەوە کە هێشتا وردبینی تەواو بۆ لیستی مووچەیان نەکراوە.
