پشکی بودجەی هەرێمی کوردستان لە بودجەی ئەمساڵی عێراق 14 ترلیۆن و 840 ملیار دینارە

SNN-
ئەندامێکى ئەنجومەنى نوێنەرانى عێراق بڕى بودجەى ئەمساڵى عێراق و پشکى هەرێمی کوردستان ئاشکرا دەکات و لەبارەى چارەنوسى مووچەى مووچەخۆرانى هەرێمیشەوە دەڵێت:”پەیوەست بە مووچەی هەرێم بە بڕیاری دادگای فیدراڵی پەیوەستە بە تەوطين و داهاتی ناوخۆ، تاکو ئەمکاتە هیچ هەنگاوێکی کرداری بۆ جێبەجێکردنی بڕیاری دادگای فیدراڵی نەنراوە”.

سۆران عومەر، ئەندامى ئەنجومەنى نوێنەرانى عێراق بڵاویکردووەتەوە، بودجەی ئەمساڵی عێراق 211 ترلیۆن و 861 ملیار دینارە و لەو بڕەش 120 ترلیۆن و 49 ملیار دیناری داهاتی نەوتییە و 27 ترلیۆن و 340 ملیار دینار داهاتی نانەوتییە.

دەشڵێت:” لە بودجەى ساڵى 2024ـى عێراق بڕى 64 ترلیۆن دینار کورتهێنان هەیە و 10 ترلیۆن و 42 ملیار دینار نەفەقاتی حاکیمەیە.

لەبارەى پشکى هەرێم لە بودجەى ساڵى 2024  رایگەیاندووە کە 14 ترلیۆن و 840 ملیار دینار پشکی هەرێمە و لەو بڕەش 11 ترلیۆن و 576 ملیار دینار بۆ مووچەی مووچەخۆرانی هەرێم دانراوە کە مانگانە دەکاتە 965 ملیار دینار.

دەشڵێت:” ترلیۆنێک و 116 ملیار دینار لە پشکى هەرێمى کوردستان بۆ قەرزی بانکى TBI دەبڕدرێت”.

لەبارەى مووچەى مووچەخۆرانى هەرێمى کوردستانیشەوە ئەو ئەندامەى ئەنجومەنى نوێنەرانى عێراق نووسیویەتی:”پەیوەست بە مووچەی هەرێم بە بڕیاری دادگای فیدراڵی پەیوەستە بە تەوطين و داهاتی ناوخۆ، تاکو ئەمکاتە هیچ هەنگاوێکی کرداری بۆ جێبەجێکردنی بڕیاری دادگای فیدراڵی نەنراوە”.