حکومەتی بەریتانیا ژنێک و سێ منداڵی داعش دەگەڕێنێتەوە وڵاتەکەی

SNN

هێزەکانی سووریای دیموکرات (هەسەدە) ژنێک و سێ منداڵی چەکدارانی داعشیان ڕادەستی شاندێکی بەریتانی کردەوە، بەمەش تەنیا لەم مانگەدا 25 کەسی بیانی لە خانەوادەی چەکدارانی داعش لە کەمپەکانی ڕۆژئاوا، ڕادەستی وڵاتەکانیان بکرێت.

ئەمڕۆ شەممە، ئاژانسی فرانس پرێس لە زاری سەرچاوەیەکی بەرپرسی ئیدارەی خۆسەر بڵاوی کردووەتەوە، ئەو چوار کەسەی ڕادەستی شاندە بەریتانییەکە کراونەتەوە، لە کەمپی ڕۆژ دەست بەسەربوون کە یەکێک لەو دوو کەمپانەی ژن و منداڵانی چەکدارانی داعشی تێدا دەست بەسەر کراون.

هەروەها ئیدارەی خۆسەر لە پێگەی ئەلیکترۆنی خۆی بڵاوی کردووەتەوە، ئەو چوار هاووڵاتییە بەریتانییەیان ڕادەستی شاندێکی فەرمی بەریتانی کردووەتەوە کە ئان سنۆ نێردەی تایبەتی شانشینی یەکگرتوو لە سووریا سەرۆکایەتیی دەکرد، لەلایەن خۆیەوە وەزارەتی دەرەوەی بەریتانیاش بڵاوی کردووەتەوە، کە بەریتانیا کار ئاسانی زۆری کردووە بۆ گەڕاندنەوەی هاووڵاتییانیان کە لە کەمپەکانی سووریان.