ئەمڕۆ ئەنجوومەنی وەزیران لەسەر ئەم پرسانە کۆدەبێتەوە

SNN

ئەمڕۆ ئەنجوومەنی وەزیران لەسەر چوار بڕگەی سەرەکی کۆدەبێتەوە، لە بڕگەیەکى کۆبوونەوەکەدا وەزیرى دارایی و شاندى دانوستانکار راپۆرتێک لەبارەى خشتەکانى هاوپێچى یاساى بودجەى گشتى فیدراڵى بۆ ساڵەکانى 2024-2025 دەخەنە روو.

ئەمڕۆ چوارشەممە 29ی ئایار، ئەنجوومەنی وەزیران کۆدەبێتەوە، لە کۆبونەوەکەدا لەلایەن سەرۆکى دەستەى ناوچە کوردستانییەکانى دەرەوەى ئیدارەى هەرێم کە میواندارى کۆبونەوەکەیە، راپۆرتێک لەبارەى دۆخى ئێستاى ناوچە دابڕێنراوەکان دەخرێتەڕوو.

هاوکات، لە تەوەرێکى دیکەدا وەزیرى کار و کاروبارى کۆمەڵایەتیی راپۆرتێکى وەزارەتەکە دەخاتەڕو کە تایبەتە بە برەودان بە سندوقى پشتیوانى پرۆژە بچوکەکانى لاوان و پێشکەشکردنى ئاسانکاریی زیاتر، کە ئەم سندوقە پاڵپشتى دارایی بۆ پرۆژە بچوک و مامناوەندەکان لەخۆدەگرێت  و قەرز بۆ کارخوازان تەرخان دەکرێت.

لە هەمان کاتدا، وەزیرى ئاوەدانکردنەوە و نیشتەجێکردنیشەوە راپۆرتێک لەبارەى رێگا سەرەکییەکانى نێوان شارەکان و کاریگەریی هاتوچۆى تانکەر و بارهەڵگرەکان و بەتایبەت رێگاى نێوان هەولێر و سلێمانى دەخرێتەڕو.