وەزارەتی دارایی و ئابوری نوسراوێک ئاڕاستەی دەروازە سنورییەکان دەکات

SNN

وەزارەتی دارایی و ئابوریی هەرێم بە نوسراوێک دەروازە سنورییەکان ئاگادار دەکاتەوە و داوادەکات پسوڵەی بارکردن بەشێوەی کاتی رابگرن.

ئەمڕۆ چوارشەممە 29ی ئایار، وەزارەتی دارایی و ئابووری حکومەتی هەرێمی کوردستان نووسراوێکی ئاڕاستەی بەڕێوەبەرایەتییەکانی گومرگی حاجی ئۆمەران، باشماخ و گەرمیان کردووە و تیایدا هاتووە، بەبڕیاری وەزیری دارای و ئابووری، بۆ ماوەی سێ رۆژ داواکردنی بەڵگەنامەی پسوڵەی بارکردن “بوڵیسەی شحن” بەشێوەیەکی کاتی ڕابگرن.

ئاماژە بەوەکراوە، ڕاگرتنی داواکردنی پسوڵەی بارکردن، تاوەكو ئەو کاتە دەبێت حکومەتی هەرێمی کوردستان ئەو پرسە لەگەڵ بانکی بازرگانی عێراق TBI تاوتوێدەکات، هاوکات بڕیارەکە لە کاتژمێر 08:00ی بەیانی رۆژی 29ی ئایاری 2024ەوە جێبەجێ دەکرێت، لە هەمان کاتدا پێویستە لە پسووڵەی بارکردن “بوڵیسەی شەحن”دا ئەم زانیارییانە هەبێت، ناوی خاوەنی بار، لەکوێیەوە بارەکەی بۆ هاتووە و بارەکەی بەچەند کڕدراوە.

روونیشکراوەتەوە، ئامانج لە بۆڵیسەی شەحن، بۆ رێگەگرتنە لە سپیکردنەوەی پارە و بردنە دەرەوەی دراوی بیانی، لەکاتێکدا بازرگانان بە نرخی فەرمی دۆلاریان لەلایەن حکومەتەوە پێدەدرێت.

ئەمەش لە کاتێکدایە، ماوەی چەند رۆژێکە، شۆفێری بارهەڵگرەکانی مەرزی پەروێزخان، خۆپیشاندان دەکەن لە دژی ئەوەی لەلایەن کۆمپانیایەکەوە بۆ هەر بارێک بڕی 15 هەزار دیناریان لێوەردەگیرێت.