رێككه‌وتنێكى نهێنى ئه‌ردۆغان و سودانى له‌سه‌ر هه‌رێمى كوردستان ئاشكرا ده‌بێت
محه‌مه‌د شیاع سودانى، سه‌رۆكوه‌زیرانى عێراق و ڕه‌جه‌ب ته‌یب ئه‌ردۆغان، سه‌رۆككۆمارى توركیا | فۆتۆ: AA
SNN
په‌یمانگاى واشنتن بۆ لێكۆڵینه‌وه‌ى ستراتیژى ئاشكرایده‌كات، حكومه‌تى عێراق و حكومه‌تى توركیا له‌كاتى سه‌ردانى ڕه‌جه‌ب ته‌یب ئه‌ردۆغان، سه‌رۆككۆمارى توركیا بۆ عێراق رێككه‌وتنێكیان واژوو كردووه به‌مه‌به‌ستى رێگه‌دان به مانه‌وه‌ى هه‌میشه‌یی هێزه‌كانى توركیا له عێراق.
مانگى نیسان، ڕه‌جه‌ب ته‌یب ئه‌ردۆغان، سه‌رۆككۆمارى توركیا سه‌ردانى عێراقى كرد و له میانى سه‌ردانه‌كه‌یدا 27 رێككه‌وتننامه‌ى له بواره‌كانى ئابوورى و سه‌ربازى له‌گه‌ڵ كابینه‌ى حكومه‌ته‌كه‌ى محه‌مه‌د شیاع سودانى واژوو كرد.
ئه‌مڕۆ شه‌ممه 1ى حوزه‌یران، په‌یمانگاى واشنتن بۆ لێكۆڵینه‌وه‌ى ستراتیجى ئاشكراى كرد، “یه‌كێك له رێككه‌وتنه‌كان بریتیبووه له رێگه‌دان به مانه‌وه‌ى سوپاى توركیا له ناوچه سنوورییه‌كان بۆ هه‌میشه له‌به‌رامبه‌ر رێككه‌وتن له‌سه‌ر به‌ردانه‌وه‌ى ئاوى زياتر بۆ عێراق”.
په‌یمانگاكه ئه‌وه‌شى ئاشكرا كردووه، “ئه‌گه‌رى زۆره له داهاتوودا ئه‌و رێككه‌وتنه بچێته‌بوارى جێبه‌جێكردنه‌وه”.
رێككه‌وتنه‌كه‌ى نێوان عێراق و توركیا له‌كاتێكدایه، كه به بیانووى هه‌بوونى چه‌كدارانى پارتى كرێكارانى كوردستان كه حزبێكى دژبه‌رى توركیایه سوپاى توركیا چه‌ند ده‌یه‌یه‌كه له ناوچه سنورییه‌كانى هه‌رێمى كوردستان و توركیا جێگیر بووه، ئه‌مه سه‌ره‌ڕاى ئه‌وه‌ى رۆژانه گوند و ناوچه‌كانى هه‌رێمى كوردستان بۆردومان ده‌كات به هه‌مان هۆكار.
