لیستی مووچەی مانگی پێنج رەوانەی بەغدا کرا

SNN

وەزارەتی دارایی و ئابوریی هەرێم رایگەیاند، لیستی مووچەی مانگی ئایاری فەرمانبەران رەوانەی حکومەتی فیدراڵ کراوە، وابڕیارە لە هەفتەی داهاتوودا وردبینیکردنی تەواو ببێت.

ئەمڕۆ سێشەممە 4ی حوزەیران، وەزارەتی دارایی و ئابوری هەرێم رایگەیاند، ئەمڕۆ لیستی مووچەی مانگی ئایاری فەرمانبەران و مووچەخۆرانی هەرێمی کوردستان رەوانەی وەزارەتیی دارایی حکومەتی فیدراڵ کرا.

ئەمە لە کاتێکدا، هێشتا بەشێک لە فەرمانبەران و هێزە ئەمنییەکان مووجەی مانگی چواریان وەرنەگرتووە و روون نییە کەی بەغدا مووچەکەیان دەنێرێت، هاوکات تەیف سامی، وەزیری دارایی عێراق پێشتر لەوبارەوە رایگەیاندبوو، بەهۆی ئەوەی لیستی مووچەی هێزە ئەمنییەکان ناوەکان تیایدا زیادیکردووە و کەسانێکی تێدایە کە رەگەزنامەیان عێراقی نییە بۆیە واژۆی لەسەر لیستەکە نەکردووە.

سەرچاوەیەکیش لە وەزارەتی دارایی هەرێم بە SNNی راگەیاندبوو، حکومەتی هەرێم بە مەرج لیستی مووچەی مانگی پێنج بۆ بەغدا دەنێرێت، ئەویش ئەوەی بەغدا مووچەی مانگی چواری هێزە ئەمنییەکان بنێرێت، بەڵام تاکو ئێستا روون نییە کە ئایا بەغدا بڕیاری لەسەر ناردنی پارەکەیان داوە یاخود نا.