مامۆستایان و فەرمانبەرانی ناڕازی: خۆپیشاندان ئەنجام دەدەین

SNN

لە دژی دواخستنی ناردنی لیستی مووچە بۆ بەغدا و بۆ رەتکردنەوەی هەژماری من و دواخستنی تەوتین لە رێگەی بانکەکانی حکومەتی فیدڕاڵی، دەستەی مامۆستایان و فەرمانبەرانی ناڕازی رایگەیاند، خۆپیشاندان ئەنجام دەدەن.

ئەمڕۆ هەینی 7ی حوزەیرانی 2024 لە کۆنفڕانسێکی رۆژنامەوانیدا لە شاری سلێمانی دەستەی داکۆکی لە مامۆستایان و فەرمانبەرانی ناڕازی رایگەیاند، “کابینەی نۆیەم نایەوێت بڕیارەکانی دادگای فیدڕاڵی جێبەجێ بکات، بەردەوام کات دەکوژێت و گوێ بە چۆنێتی ژیان و گوزەرانی هاووڵاتیان نادات، ئەم کابینەیە لە پێناو مانەوەی خۆیدا خەریکی داتاشینی دوژمنی وەهمییە و بە درێژایی تەمەنی ئەم کابینەیە نەیانتوانیوە تەنیا یەک جار لە کاتی خۆیدا مووچە دابەش بکەن و تەنیا خەریکی بەرپاکردنی جەنگی دەرونیبوون لەگەڵ فەرمانبەراندا”.

باسیان لەوەشکرد، “ئەم کابینەیە وەستای قسان و کۆڵەواری دەستان بووە و نایەوێت لە کاتی خۆیدا لیستی مووچەش بۆ بەغدا بنێرێت، ئەگینا عێراق ئامادەیە پێش جەژن مووچەی هەردوو مانگەکانی پێنج و شەش رەوانە بکات”.

دەستەکە هۆشداری بە حکومەتی هەرێم و وەزیری دارایی دا کە لەو دواخستنە مەبەستدارەی ناردنی لیستی مووچە بۆ بەغدا بێدەنگ نابن و کاردانەوەی توندیان دەبێت و بەم زووانە خۆپیشاندان ساز دەکەن “لە دژی دواخستنی ناردنی لیستی مووچە بۆ بەغدا، لە دژی “هەژماری ئەوان” و دواخستنی تەوتین و رازی نەبوونیان بە “هەندێک بانکی گوماناوی” و جەختکردنەوە لە سەر تەوتین لە رێگەی بانکەکانی رەشید و رافیدەین”.

جەختیشییان کردەوە، کە “دواکەوتنی مووچەی هێزە ئەمنییەکان لە ئەستۆی حکومەتی هەرێمدایە و دەیان هەزار ناو و کۆدی وەهمی خزاندووەتە ناو لیستەکانیان و ئاماد نییە لیستەکانیان بە پوخستی رەوانەی بەغدا بکات”.