“بەڕێككەوتنی سیاسی دەكرێت مامۆستایانی وانەبێژ دابمەزرێندرێن”
SNN-عەلی حەمە سەعید
سەرەڕای ئەوەی لەهەمواری پرۆژەیاسادی بودجەی گشتی عێراق هیچ بڕە پارەیەك بۆ دامەزراندنی مامۆستایانی وانەبێژ و هەروەها پلەبەرزكردنەوەی فەرمانبەران تەرخاننەكراوە و هەموارەكەش پەسەندكراوە، بەڵام شارەزایەكی دارایی و ئابووری جەخت لەوەدەكاتەوە كە بەگوێرەی مادەی 60 لە پرۆژەیاسای بودجە لەدەستەڵاتی سەرۆكوەزیراندا هەیە مامۆستایانی وانەبێژ دابمەزرێنێت، بەڵام ئەوە پێویستی بەڕێككەوتنی سیاسی هەیە.
عوسمان محەمەد، شارەزا لە كاروباری دارایی و ئابووری بە SNNێ ڕاگەیاند: دوای پەسەندكردنی هەمواری پرۆژەیاسای بودجەی گشتی بۆ ساڵی 2024 لە ناو خشتەی بودجەكەدا بە هیچ جۆرێك ناوی مامۆستایانی وانەبێژی تێدانییە، هاوكات هیچ بڕە پارەیەك دیارینەكراوە بۆ ئەو توێژە بەمەبەستی دامەزراندنیان و پلە بەرزكردنەوەی فەرمانبەران، بۆیە لەدوای پەسەندكردنی خشتەی بوجەی 2024 هیچ رێگەچارەیەك بۆ دامەزراندنی وانەبێژان نەماوە جگە لەیەك ڕێگاچارە.
ئاماژەی بەوەشكرد، بۆ ئەوەی مامۆستایانی وانەبێژ دابمەزرێن بە گرێبەست بێت یاخود هەمیشەیی، ئەوا دەبێت وەزارەتی دارایی هەرێم لیستی مامۆستایانی وانەبێژ، ناو و زانیارییەكانیان بنێرێت بۆ وەزارەتی دارایی عێراق، پاشان وەزارەتی دارایی عێراقیش لەلایەن دیوانی چاودێری دارایی عێراقەوە وردبینی دەكات بەو زانیارییانەی بۆی هاتووە، دوای ئەو داواكارییە دەنێرێت بۆ سەرۆكایەتی ئەنجومەنی وەزیران.
ئەو شارەزایەی بواری دارایی و ئابووری ئەوەشی خستەڕوو، بەگوێرەی ماددەی 60 لە یاسای بودجەی دەسەڵاتی داوە بە سەرۆكی ئەنجومەنی وەزیران پارە زیاد بكات بۆ دامەزراندنی مامۆستایانی وانەبێژ، پلەی بەرزكردنەوەی فەرمانبەرانی هەرێم و بەهەمیشەیی كردنی گرێبەستەكانی هەرێم، بەڵام ئەم كارە پێویستی بە رێكەوتنی سیاسی هەیە و دەبێت شاندی دانوستانكاری هەرێم بەو كارە هەستێت.
