به‌رزبوونه‌وه‌ى پله‌ى گه‌رما و پچڕانى كاره‌با به‌ڕێژه‌ى 30% تووندوتیژى خێزانى زیادده‌كات له عێرق
كه‌سێك كه تووندوتیژى به‌رامبه‌ر كراوه | فۆتۆ: MUNDO
SNN
به‌پێى توێژینه‌وه‌یه‌ك كه له‌سه‌ر زیادبوونى رێژه‌ى تووندوتیژى له مانگه گه‌رمه‌كاندا كراوه، له مانگه‌كانى حوزه‌یران، ته‌مووز و ئاب به‌هۆى به‌رزبوونه‌وه‌ى پله‌كانى گه‌رما و پچڕانى كاره‌باوه رێژه‌ى تووندوتیژى خێزانى 30% زیادده‌كات.
ئه‌مڕۆ سێشه‌ممه 11ى حوزه‌یران، به‌ڕێوه‌به‌رى كۆمسیۆنى مافه‌كانى مرۆڤ له پارێزگاى دیاله رایگه‌یاند، “له مانگه‌كانى حوزه‌یران، ته‌مووز و ئاب كه پله‌كانى گه‌رما به‌رزده‌بنه‌وه و رێژه‌ى پێدانى كاره‌با كه‌مده‌بێته‌وه، هاوكات له‌گه‌ڵ هاتنى پشووى هاوین كه سه‌رجه‌م ئه‌ندامه‌كانى خێزان له ماڵه‌وه ده‌بن فشارى ده‌روونى له‌سه‌ر تاكه‌كانى كۆمه‌ڵگه زیاتر ده‌بێت”.
وتیشى: “هه‌موو ئه‌مانه هۆكارن بۆ ئه‌وه‌ى كه كێشه خێزانییه‌كان زیاد ببن، پاشان بگۆڕێن بۆ تووندوتیژى خێزانى”.
به وته‌ى، به‌ڕێوه‌به‌رى كۆمسیۆنى مافه‌كانى مرۆڤ له پارێزگاى دیاله، “له ئه‌نجامى توێژینه‌وه‌یه‌ك كه ئه‌نجامیانداوه بۆیان ده‌ركه‌وتووه، “له مانگه گه‌رمه‌كاندا رێژه‌ى تووندوتیژى خێزانى 30% زیادده‌كات”.
هه‌ر له‌و باره‌یه‌وه، عه‌بدولوه‌هاب قه‌یسى، توێژه‌رى كۆمه‌ڵایه‌تى ده‌ڵێت: “عێراقیه‌كان تاكێكى زۆر ئارامگرن، ده‌نا له كه‌شێكدا كه پله‌ى گه‌رمى 50 پله‌ى سیلیزى بێت و كاره‌با نه‌بێت مرۆڤ چۆن هه‌ستده‌كات؟! له‌به‌ر ئه‌وه نه‌بوونى كاره‌با و هه‌ژارى و به‌رزى پله‌كانى گه‌رما فشاره ده‌روونییه‌كان زیادده‌كه‌ن و ده‌بنه هۆكارى دروستبوونى كێشه‌ى خێزانى”.
