دوا بڕیار لەبارەی سێ مووچەكەی ساڵی رابردوو دەرچوو

SNN

پەرلەمانتارێك دوایین بڕیاری وەزارەتی دارایی عێراق دەربارەی سێ مووچە نەدراوەكەی ساڵی رابردووی مووچەخۆرانی هەرێم ئاشكرادەكات.

سۆران عومەر، ئەندامی ئەنجومەنی نوێنەرانی عێراق رایگەیاند، پاش ئەوەی لەماوەی رابردوودا (ئەنجومەنی سەرتاسەری مامۆستایان و فەرمانبەرانی ناڕازی) سەردانی شاری بەغدادیان کرد، داوای سێ مووچەکەی ساڵی 2023مان بە نوسراوی ژمارە (765/د لە 2024/5/22) بە یاداشتێکی مامۆستایان و فەرمانبەران ئاراستەی وەزیری دارایی فیدراڵ کرد.

روونیشیكردەوە، لە وەڵامدا وەزارەتی دارایی عێراق بە نوسراوی ژمارە (15533 لە 2024/6/10) ئاماژە بەوە دەکات لەڕێی بانكەكانی رەشید، رافیدەین و TBI بە چوار بڕیاری ئەنجومەنی وەزیران پارەیان بۆ هەرێم ناردووە و ئەو بابەتەش (سێ مووچەکە) لە تایبەتمەندیی حکومەتی هەرێمی کوردستانە.

سۆران عومەر دووپاتیشیكردەوە، “هەرچەندە وەڵامەكە پرسی ئەو سێ مووچەیەی بە نادیاری هێشتۆتەوە، بەڵام بەرپرسیارێتیەکەی خستۆتەسەر حکومەتی هەرێم”.