“دوای پشووی جەژن ڕێككەوتنی نێوان كۆمپانیاكان وعێراق وهەرێم لەسەر پرسی نەوت دێتە ئاراوە”

SNN-عەلی حەمەسەعید

ئەندامێكی ئەنجومەنی نوێنەرانی عێراق لە فراكسیۆنی پارتی ئاماژەبەوەدەكات بڕی زیاتر لەچوار تریلیۆن دینار لەبودجەی گشتی ساڵی تەرخانكراوە بۆ دەرهێنان و گواستنەوەی نەوتی هەرێمی كوردستان بۆ بەندەری جەیهانی توركیا، دوای پشووی جەژن ڕێككەوتنی نێوان كۆمپانیاكان و حكومەتی عێراق وهەرێم لەسەر پرسی نەوت دێتە ئاراوە .

شیروان دوبەردانی، ئەندامی ئەنجومەنی نوێنەرانی عێراق لە فراكسیۆنی پارتی بە SNNی ڕاگەیاند: لە كۆبوونەوەكانی نێوان حكومەتی هەرێم و بەغدا بۆ دەستپێكردنەوەی هەناردەكردنی نەوت لە ڕێگەی بەندەری جەیهان بەرەوپێشچوونی باش هاتووەتەئاراوە، هاوكات ئەو خاڵەی كە ناكۆكی بوو و  هێشتاش بە هەڵپەسێردراوی ماوەتەوە بابەتی گرێبەستەكانە لەگەڵ كۆمپانیاكانی دەرهێنانی نەوت.

ئاماژەی بەوەشكرد، بڕی زیاتر لە چوار تریلیۆن دینار لە خشتەی و بودجەی ساڵی 2023 بۆ  2024 تەرخانكراوە بۆ دەرهێنان و گواستنەوەی نەوتی هەرێمی كوردستان بۆ بەندەری جەیهانی توركیا هاوكات لە گفتوگۆكانی نێوان بەغدا و هەرێم هیچ كۆسپێكی هێندە گەورە بوونی نییە بەڵكوو بەپێچەوانەوە لە دوایین كۆبوونەوەی وەزارەتی سامانە سروشتییەكان و كۆمپانیاكانی دەرهێنانی نەوت لەگەڵ وەزیری نەوتدا گفتوگۆكان بە باشی بەڕێوەچوون

ئەو ئەندامەی ئەنجومەنی نوێنەرانی عێراق ئەوەشی خستەڕوو، بەغدا داوا دەكات گرێبەستە هاوبەشییەكان بۆ قازانج بێت نەك شەریكایەتییەكی تەواو هاوكات نرخی گواستنەوەی نەوت كە لەسەری ڕێككەوتوون بریتییە لە هەشت دۆلار بۆیە دوای پشووی جەژن ڕێككەوتنی نێوان كۆمپانیاكان و حكومەتی عێراق وهەرێم لەسەر پرسی نەوت دێتە ئاراوە.