“له چه‌ند رۆژى داهاتوودا نێچیرڤان بارزانى كاتى هه‌ڵبژاردن دیارى ده‌كات”
نێچیرڤان بارزانى، سه‌رۆكى هه‌رێمى كوردستان | فۆتۆ: سه‌رۆكایه‌تى هه‌رێم
SNN
كه‌مێك له‌مه‌وبه‌ر، سه‌رۆكى حزبى سۆسیالیستى دیموكراتى كوردستان له‌دواى كۆبوونه‌وه‌ى له‌گه‌ڵ سه‌رپه‌رشتیارى وه‌زاره‌تى ده‌ره‌وه‌ى ئێران وتى: له چه‌ند رۆژى داهاتوودا سه‌رۆكى هه‌رێمى كوردستان رۆژێكى نوێ بۆ به‌ڕێوه‌چوونى هه‌ڵبژاردنى په‌رله‌مانى كوردستان دیاریده‌كات.
ئه‌مڕۆ هه‌ینى 14ى حوزه‌یران، عه‌لى باقرى، له میانى سه‌ردانه‌كه‌یدا بۆ هه‌رێمى كوردستان سه‌ردانى شارى سلێمانى كرد و له‌گه‌ڵ به‌شێك له لایه‌نه‌كان كۆبوه‌وه.
له‌دواى كۆبوونه‌وه‌ى له‌گه‌ڵ لایه‌نه‌كان، محه‌مه‌د حاجى مه‌حمود، سه‌رۆكى حزبى سۆسیال دیموكراتى كوردستان كه به‌شدارى كۆبوونه‌وه‌كه بوو، له‌باره‌ى ناوه‌ڕۆكى كۆبوونه‌وه‌كه‌وه وتى: “یه‌كێك له بابه‌ته‌كانى كۆبوونه‌وه‌كه ئه‌نجامدانى هه‌ڵبژاردنى په‌رله‌مانى كوردستان بوو”.
وتیشى: “له چه‌ند رۆژى داهاتوودا نێچیرڤان بارزانى، مه‌رسومێكى نوێ ده‌رده‌كات و به‌روارێكى نوێ بۆ هه‌ڵبژاردنى په‌رله‌مانى كوردستان دیاریده‌كات”.
به وته‌ى سه‌رۆكى حزبى سۆسیال دیموكراتى كوردستان، “سه‌رجه‌م لایه‌نه‌كانى هه‌رێمى كوردستان رێككه‌وتوون له‌سه‌ر ئه‌نجامدانى هه‌ڵبژاردن له واده‌یه‌كى نزیكدا”.
سه‌رۆكى پارتى سۆسیال دیموكراتى كوردستان سوپاسى سه‌رپه‌رشتیارى وه‌زاره‌تى ده‌ره‌وه‌ى ئێرانى كرد كه توانیویه‌تى لایه‌نه‌كان كۆبكاته‌وه و وتى: “به‌داخه‌وه ئێمه‌ى حزبه‌كان ناتوانین خۆمان كۆبینه‌وه، به‌ڵام عه‌لى باقرى توانى كۆمان بكاته‌وه”.
