هەڤاڵ ئەبوبەکر: هیوادارین جارێکی دیکە دەست بۆ رۆژ ژمێری مووچە نەبرێت

پارێزگاری سلێمانی رایگەیاند، دەبوو ئەو 38 مووچەیەی لێبڕین و پاشەكەوتی لێكراوە بدرایەتەوە بە مووچەخۆران، دەشڵێت:”هیوادراین جارێکی دیکە حکومەت دەست بۆ رۆژ ژمێری مووچە نەبات و 30 رۆژ جارێك مووچە دابەشبكرێت”.

د. هەڤاڵ ئەبوبەكر، پارێزگاری سلێمانی لە لێدوانێکدا لە دوای مەراسیمی جەژن لە مزگەوتی مەشخەڵان لە سلێمانی پیرۆزبایی جەژنی قوربانی لە هاووڵاتییان کرد و رایگەیاند:”هیوادارم جەژن ببێتە هۆی یەكڕیزی و لێكتێگەیشتن و ئومێدەوارین دوای جەژن یاسای بودجە جێبەجێبكرێت و بودجەی پەرەپێدانی پارێزگاكان بۆ هەرێمی كوردستان رەوانەبكرێت”.

سەبارەت بە دابەشکردنی ئەو فەرمانبەرانەی کە پێش جەژن مووچەیان وەرنەگرتووە وتیشی:”دەبوو ئەو 38 مووچەیەی لێبڕین و پاشەكەوتی لێكراوە بدرایەتەوە بە مووچەخۆران و سێ مووچەنەدراوەكەی ساڵی رابردوو خەرجبكرایە و هیوادارین چی دیکە دەست بۆ رۆژ ژمێری مووچە نەبرێت و 30 رۆژ جارێك مووچە دابەشبكرێت”.