کەشناسێک کەشوهەوای رۆژانی جەژن و هاوین ئاشکرا دەکات

SNN

شارەزایەکی کەشناسی رایدەگەیەنێت، شەپۆلێکی گەرما لە ئەفریقا و زەریای هیندی و کەنداوی عەرەبی روو لە هەرێمی کوردستان دەکات، بەو هۆیەوە رۆژانی جەژن پلەکانی گەرما بەرز دەبنەوە دەگەنە سەرو 40 پلەی سەدی .

سالار حاجی عەلی، شارەزای کەشناسی لە لێدوانێکدا بە SNNی راگەیاند، شەپۆلێکی گەرما لە ئەفریقا و زەریای هیندی و کەنداوی عەرەبی لە دوێنێوە روی لە هەرێم کردووە و پلەکانی گەرمای بەرزکردووەتەوە و راددەی شێی لە هەوادا زیادکردووە.

ئاماژەی بەوەکردووە، بەهۆی ئەم شەپۆلە گەرمایەوە لە ناوچەکانی هەرێم هەست بە گەرمایەکی بێزارکەر دەکرێت و لە ناوچە کوێستانییەکان پەڵە هەوری دروستکردووە، بەهۆیەوە پەستانی گەرمی دابەزاندووە و پلەکانی گەرمای بەرزکردووەتەوە.

سەبارەت بە کاریگەری ئەم شەپۆلە گەرمایە روونیکردووەتەوە، کاریگەرییەکەی بۆ هەر چوار رۆژی جەژن بەردەوام دەبێت و تاوەکو 21ی حوزەیران ئەم شەپۆلی گەرمایە درێژەی دەبێت، هاوکات لە وەرزی هاویندا دووبارە پلەکانی گەرما روو لە بەرزبوونەوە دەکەن و پلەکانی گەرماش لە زۆرینەی ناوچەکانی هەرێم بۆ سەرو 40 پلەی سەدی بەرزدەبێتەوە.