“بەلایەنی كەم پێویستمان بە چوار مانگ دەبێت بۆ ئەنجامدانی پرۆسەی هەڵبژاردن”

SNN-عەلی حەمە سەعید

وتەبێژی كۆمیسیۆنی باڵای سەربەخۆی هەڵبژاردنەكانی عێراق ئاماژە بەوەدەكات وەڵامنەدانەوەی سەرۆكی هەرێم بە پێشنیارەكەی ئێمە بۆ ئەنجامدانی هەڵبژاردن لە 5/9 و هەروەها دیارینەكردنی ڕۆژی هەڵبژاردن كاریگەری خراپ دەكات لە ڕاپەڕاندنی ئیشوكارەكانمان، چونكە بەلایەنی كەم پێویستمان بە سێ‌ تا چوار مانگ دەبێت بۆ ئەنجامدانی پرۆسەی هەڵبژاردن لەدوای دیاریكردنی وادەكەی لەلایەن سەرۆكی هەرێمەوە، لەكاتێكدا تەمەنی كۆمیسیۆن دیاركراوە.

جومانە غەلای، وتەبێژی كۆمیسیۆنی باڵای سەربەخۆی هەڵبژاردنەكانی عێراق بە SNNی ڕاگەیاند: تا ئەمڕۆ لەلایەن سەرۆكایەتی هەرێم وەڵامی پێشنیارەكەمان نەدراوەتەوە كە پێشنیارمان كردبوو ڕۆژی 5/9 پرۆسەی هەڵبژاردنی پەرلەمانی كوردستان بەڕێوەبچێت، هاوكات تا ئەمڕۆش لەلایەن سەرۆكایەتی هەرێمەوە هیچ وادەیەكی نوێ‌ دیارینەكراوە ئەمەش كاریگەری خراپی كردووەتە سەر ئیشوكارەكانمان بەجۆرێك زۆرێك لەكارەكانمان راگرتووە تائەوكاتەی وادەیەكی نوێ‌ دیاریدەكرێت بۆ رۆژی هەڵبژاردن.

ئاماژەی بەوەشكرد، ئێمە لە كۆمیسیۆن بەلایەنی كەم پێویتمان بە سێ‌ تا چوار مانگ هەیە لەدوای دیاریكردنی وادەی هەڵبژاردن بۆ بەڕێوەبردنی پرۆسەكە، چونكە بەلایەنی كەم مانگێكان دەوێت تا ئەوكاتەی ئەنجامەكان ڕادەگەیەنین و هەروەها تانەكان یەكلایی دەكەینەوە، بۆیە بەدڵنیاییەوە ئێستا ناتوانین بڵێین لە 5/9 دەتوانین هەڵبژاردن بەڕێوەببەین.

وتەبێژەكەی كۆمیسیۆنی باڵای سەربەخۆی هەڵبژاردنەكانی عێراق ئەوەشی خستەڕوو، كۆمیسیۆن لەسەر بنەمای دیاریكردنی وادەی هەڵبژاردن كارەكانی دیاری دەكات، لەكاتێكدا تەمەنی ئەم كۆمیسیۆنەی كە ڕاسپێدراوە بۆ سەرپەرشتیكردنی پرۆسەی هەڵبژاردن دیاریكراوە و هەر رۆژێك دواكەوتن كاریگەری دەكاتە سەر كارەكانی كۆمیسیۆن، بۆیە چاوەڕێی سەرۆكایەتی هەرێم دەكەین مەرسووم بۆ دیاریكردنی وادەی نوێی هەڵبژاردن دەربكات.