“بە دواخستنی هەڵبژاردن متمانەی نێودەوڵەتیی و حكومەتی عێراقیش لەدەستدەدەین”
SNN-عەلی حەمەسەعید
لێپرسراوی مەكتەبی هەڵبژاردنی یەكێتیی نیشتمانیی كوردستان ئاماژە بەوەدەكات یەكێتی هەمیشە ئامادە بووە بۆ ئەنجامدانی هەڵبژاردن لەوادەی خۆیدا و لەوەش زیاتر دوابكەوێت متمانەی نێودەوڵەتیی و حكومەتی عێراقیش لەدەستدەدەین، جەختیش دەكاتەوە دروستكردنی هەر بەربەستێكیش لەبەردەم ئەو پرۆسە گرنگەدا، لێدانە لە خواستی خەڵك و رەوتی دیموكراسی.
رزگار حاجی حەمە، لێپرسراوی مەكتەبی هەڵبژاردنی یەكێتیی نشتیمانی كوردستان بە SNNی ڕاگەیاند: “دواخستنی هەڵبژاردنی پەرلەمانی كوردستان كاریگەریی بەسەر قەوارەی هەرێمەوە هەبووە، بۆیە داوا لە پارتی و سەرجەم لایەنە سیاسییەكانی كوردستان دەكەین كە كرد رۆژی 5ی ئەیلوول هەڵبژاردن بەڕێوەبچێت، ئێمەش لە یەكێتی ئامادەی هەڵبژاردنین لەهەر كاتێك بەڕێوەبچێت، بۆیەسەرۆكی هەرێمی كوردستان پارێزەری قەوارەی هەرێمی كوردستانە و پێویستە بەزووترین كات وادەی هەڵبژاردن دیاری بكات”.
ئاماژەی بەوەشكرد، بە دواخستنی زیاتری هەڵبژاردن متمانەی نێودەوڵەتیی و حكومەتی عێراقیش لەدەستدەدەین، هاوكات پێشنیارەكانی سەرۆك بافڵ هەمان داخوازییەكانی كۆمەڵانی خەڵكی كوردستانە بۆ ئەوەی پڕۆسەی هەڵبژاردن ئەنجامبدرێت و لەوە زیاتر دوانەخرێت، هەروەها بەرژوەندی حزبی وەلابنرێت و بەرژەوەندی باڵای میللەتەكەمان رەچاوبكرێت و كوردستان لەم كێشە و گیروگرفتەی كە دروستكراوە رزگار بكرێت.
لێپرسراوی مەكتەبی هەڵبژاردنەكانی یەكێتیی نیشتمانیی كورردستان ئەوەشی خستەڕوو، یەكێتی هەموو ئامادەكارییەكی بۆ هەڵبژاردن ئەنجامداوە و لەگەڵ ئەوەداین هەموو هێز و لایەنەكان لەپێناو بەرژەوەندی باڵای نەتەوەكەمان و هەرێمەكەمان ئامادەكاری بكەن و بەشداری لە پڕۆسەی هەڵبژاردندا بكەن، ئەگەر كێشەیەكیش هەبێت، پێویستە سەرۆكی هەرێمی كوردستان پارێزەری باڵای بەرژەوەندییەكانی كوردستان بێت و وادەی هەڵبژاردن دیاریبكارت بۆئەوەی هەرێمی كوردستان لەو بۆشاییە یاسایی و دەستورییە رزگاری ببێت.
