حکومەتی عێراق مووچەی مانگی 7 دابەشدەکات

SNN-

حکومەتی عێراق دەست بە دابەشکردنی مووچەی مانگی تەمووزی خانەنشینی کرێکاران دەکات لە کاتێکدا لە هەرێمی کوردستان تاوەکو ئێستا مووچەی مانگی شەش دابەشنەکراوە.

خلود حەیران، بەڕێوەبەری گشتیی به‌شی خانه‌نشینی و ده‌سته‌به‌ری كۆمه‌ڵایه‌تیی كرێكاران لە وەزارەتی کار و کاروباری کۆمەڵایەتیی عێراق رایگەیاندووە، سەرجەم رێکارەکانی تایبەت بە دابەشکردنی مووچەی خانەنشینانی بیمەکراو تەواوبوون و دەست بە دابەشکردنی مووچەی مانگی تەممووز دەکرێت.

راشیگەیاندووە، جیاوازیی مووچەش بۆ ئەو خانەنشینانە خەرجدەکرێت كه‌ مووچه‌كانیان به‌پێی یاسای خانه‌نشینی و ده‌سته‌به‌ری كۆمه‌ڵایه‌تیی كرێكاران ژماره‌ (18)ی ساڵی (2023) و له‌ 1ی كانوونی یه‌كه‌می 2023ه‌وه‌ ده‌ستكاریكراون و بەردەوامن لە بەدواداچوون و دەستکاریکردنی مووچە لەسەر ئەو سکاڵایانەی لەلایەن خانەنشینانەوە پێشکەشدەکرێن.

دابەشکردنی مووچەی مانگی 7 لە کاتێکدایە کە ئێستا مووچەی مانگی پێنجی هێزەئەمنییەکان دابەشنەکراوە و مووچەی مانگی شەشی فەرمانبەرانیش دابەشنەکراوە.