وەزارەتی دادی عێراق لەبارەی خۆکوشتنی کچە مۆدێلێک لە زیندان روونکردنەوە دەدات

SNN

وەزارەتی دادی عێراق لە روونکردنەوەیەکدا ئەو هەواڵانە رەت دەکاتەوە کە باس لە هەڵاتن یاخود خۆکوشتنی (هەدیل سامەرای) ناسراو بە (ئوم ئەلول) لە زیندان-دا دەکات، ئاماژە بەوەش دەکات کە سەرجەمی ئەو هەواڵە راستنین.

ئەحمەد لعەیبی وتەبێژی وەزارەتەکە ئەوەی راگەیاند: بەشێکی زۆر لە تۆڕە کۆمەڵایەتییەکان باس لەوە دەکەن کە کچە مۆدێلی تیک تۆک، بەناوی (ئوم ئەلول) لە زیندان هەڵاتووە، بەڵام سەرلەبەری ئەو هەواڵانە راست نییە و ئێستا لە زیندانە و سزای ئەو تاوانەی بەسەر دەبات کە پێی بەند کراوە.

وتیشی” دۆخی ناوبراو لە ئێستادا زۆر باشە و لە زیندانی ژنان سزاکەی بەسەر دەبات، ئەو هەواڵانەشی کە دەڵێن ناوبراو کۆتایی بەژیانی خۆی هێناوە، بەهەمانشێوەی هەڵاتنەکەی دوورە لە راستییەوە”.

لە کۆتایی مانگی ئایاری رابردوو، بەرێوەبەرایەتی گشتی بەگژداچوونەوەی ماددەی هۆشبەر، سەر بە وەزارەتی ناوخۆی عێراق، کچە مۆدێلی بەناوبانگی عێراق (هەدیل سامەرای) ناسراو بە (ئوم ئەلول) دەستگیردەکات بە تۆمەتی بازرگانیکردن بە ماددەی هۆشبەرەوە، لەکاتی دەستگیرکردنیدا کیلۆیەک ماددەی هۆشبەری کریستاڵ و کیلۆیەک مادەی هۆشبەری کۆکاینی پێ دەستگیر دەکرێت.