لە هەولێر و دهۆك ڕێگری لەگەڕانەوەی ئاوارەكان دەكرێت ولە سلێمانی هیچ ئاوارەیەك نامێنێت
SNN-عەلی حەمە سەعید
بەڕێوەبەری ناحیەی عەربەت ئاشكرایكرد كە تاكۆتایی ئەم هەفتەیە دوا كاروانی ئاوارەكانی سنوری پارێزگای سلێمانی كە 290 خێزانە دەگەڕێنەوە زێدی خۆیان و بەمەش كۆتایی بە گەڕانەوەی ئاوارەكان لە سنووری پارێزگای سلێمانی دێت، بەڵام بەرپرسێكی وەزارەتی كۆچ و كۆچبەرانی عێراق ئاماژەبەوەدەكات لەهەولێر و دهۆك رێگری لە گەڕانەوەی ئاوارەكان دەكرێت و هەتا ئێستا 26 هەزار و 750 خێزان لەكەمپەكانی ئەو دوو پارێزگایە ماونەتەوە.
دابان محەمەد، بەڕێوەبەری ناحیەی عەربەتی سەر بەپارێزگای سلێمانی بە SNNی ڕاگەیاند: گەڕانەوەی ئاوارەكانی نیشتەجێی كەمپی ئاشتی لە ناحیەی عەربەت بەردەوامی هەیە و تاكۆتایی ئەم هەفتەیە كۆتا كاروانی گەڕانەوەی ئاوارەكان بۆ زێدی خۆیان ئەنجام دەدرێت كە ژمارەیان 290 خێزانە، بەوجۆرەش كۆتا كامپی تایبەت بە ئارواەكان لە سنوری پارێزگای سلێمانی دادەخرێت و هیچ ئاوارەیەك لە سنوری پارێزگای سلێمانی نامێنێت.
لای خۆیەوە سامر مەشكور، بەڕێوەبەری بەشی پارێزگاكانی هەرێمی كوردستان لە وەزارەتی كۆچ و كۆچبەرانی عیراق، بە SNNی ڕاگەیاند: لەپارێزگای هەولێر و دهۆك رێگری لە گەڕانەوەی ئاوارەكان دەكرێت بەجۆرێك لە 24/1/2024 تا 1/7/2024 تەنها 250 خێزانی ئاوارە گەراونەتەوە زێدی خۆیان و ڕێگری لە خێزانەكانی دیكە دەكرێت بگەڕێنەوە زێدی خۆیان.
بەڕێوەبەری بەشی پارێزگاكانی هەرێمی كوردستان لە وەزارەتی كۆچ و كۆچبەرانی عیراق، ئەوەشی خستەڕوو، لە پارێزگای دهۆكیش رێگری لەگەڕانەوەی ئاوارەكان بەردەوامی هەیە بەجۆرێك لەپارێزگای دهۆك لەكۆی 22 هەزار خێزانی ئاوارە هەتا ئێستا تەنها دوو هەزار و 400 خێزان گەڕاونەتەوە، هاوكات بەپێی بڕیارێكی ئەنجومەنی وەزیرانی عیراق كۆتا وادە بۆ داخستنی كەمپەكانی هەرێم 30-7-2024 ەو ئەگەر رێگرییەكان بۆ گەڕانەوەی ئاوارەكان لەلایەن وەزارەتی ناوخۆی حكومەتی هەرێمەوە بەردەوامبێت پێویستە حكومەتی عیراق رێكاری دیكە بگرێتەبەر.
