کۆمیسیۆن وادەی تۆمارکردنی هاوپەیمانی و حزبەکانی بۆ هەڵبژاردنی پەرلەمانی کوردستان درێژکردەوە

SNN

بەپێی ئەو كاتەی كۆمسیۆن دیاریی كردبوو، بڕیار بوو سبەی تۆماری حزب و هاوپەیمانیەتییەكان بۆ هەڵبژاردنی پەرلەمانی كوردستان كۆتایی بێت، بەڵام بۆ ماوەی 11 رۆژی تر كاتەكەی درێژ كردەوە.

ئەمڕۆ چوارشەممە 3ی تەمموز، جومانە غەلای، وتەبێژی كۆمسیۆنی باڵای هەڵبژاردنەكانی عێراق رایگەیاند، سبەی ماوەی پێشكەشكردنی داواكارییەكانی بەشداریی هەڵبژاردنی پەرلەمانی تەواو دەبوو، بەڵام تاکو 15ی تەمموز کاتی تۆمارکردنی حزب و هاوپەیمانێتییەکان درێژکراوەتەوە و دەتوانن تا ئەو بەروارە خۆیان تۆمار بکەن.

ئاماژەی بەوەکردووە، دوای درێژكردنەوەی تۆمار، تا ئێستە هیچ هاوپەیمانیەتییەكی نوێ‌ تۆمار نەكراوە، بەڵام داواكاری پێشكەش كراوە بۆ ئەوەی ئەو كاتە درێژ بكرێتەوە، هاوکات ئەوە بۆ جاری چوارەمە كۆمسیۆنی باڵای هەڵبژاردنەكان كاتی تۆماری حزب و هاوپەیمانەكان درێژ دەكاتەوە.

بڕیارە لە 20ـی ئۆكتۆبەری ئەمساڵ هەڵبژاردنی پەرلەمانی كوردستان بەڕێوە بچێت و لە ئێستادا كۆمسیۆن سەرقاڵی ئامادەكارییەكانە.