بڕیارى هاوتاكردنى مووچه‌ى خانه‌نشینانه هه‌رێم ده‌رچوو
دراوى عێراقى و دۆلارى ئه‌مریكى | فۆتۆ: Charles Wollertz
SNN
كه‌مێك له‌مه‌وبه‌ر حكومه‌تى هه‌رێمى كوردستان بڕیاریدا به هاوتاكردنى مووچه‌ى خانه‌نشینانى هه‌رێم له‌گه‌ڵ ناوه‌ند.
ئه‌مڕۆ چوارشه‌ممه 3ى ته‌مموز، ئه‌نجوومه‌نى وه‌زیرانى حكومه‌تى هه‌رێمى كوردستان كۆبوونه‌وه‌ى ئاسایی خۆى ئه‌نجامدا، یه‌كێك له ته‌وه‌ره‌كانى كۆبوونه‌وه‌كه بریتیبوو له هاوتاکردنى مووچەى خانەنشینانى هەرێم لەگەڵ حکومەتى فیدراڵ بەپێی یاساى خانەنشینى یەکگرتوو.
له‌و باره‌یه‌وه، سادق عوسمان، وتەبێژی یەکێتیی خانەنشینانی هەرێمی کوردستان رایگه‌یاند، “ئەنجوومەنی وەزیرانی هەرێمی کوردستان هاوتاکردنی مووچەی خانەنشینانی لەگەڵ بەغداد پەسەند کرد”
به‌پێى زانیارییه‌كانى میدیاى فه‌رمى بزووتنه‌وه‌ى گۆڕان كه وه‌زیرى دارایی له پشكى بزووتنه‌وه‌كه‌یه، ” هەر ئەمڕۆ دوای کۆبوونەوەی ئەنجومەنی وەزیران، وەزارەتی دارایی سەرجەم بەڕێوەبەرایەتییەکانی خانەنشینی راسپاردووە تاوەكو رۆژی دووشەممەی داهاتوو لیستی موچەی خانەنشینان بە هاوتاکراوی رەوانەی وەزارەتەکە بکەن”.
به مه‌به‌ستى هاوتاکردنی مووچەی خانەنشینان حكومه‌تى هه‌رێم 100 ملیار دینار پێویستە. هاوكات، لە خشتەی بودجەی ساڵی (2024 و 2025)، کە پەسەندکراوە بەغدا مانگانە بڕی 965 ملیار دینار بۆ مووچەی فەرمانبەرانی هەرێمی کوردستان رەوانە دەکات، دوای هاوتاکردنی مووچەی خانەنشینان دەبێت حکومەتی عێراق ئەو بڕە پارەیەی کە زیاد دەبێت بۆ هەرێمی کوردستانی بنێرێت.
