كۆمسیۆن رێنمایی نوێى بۆ لیست و كاندیده‌كان ده‌ركرد

SNN
كۆمسیۆنى باڵاى سه‌ربه‌خۆى هه‌ڵبژاردنه‌كانى عێراق ده‌رگاى خۆتۆماركردنى هاوپه‌یمانى و كاندیده‌كانى كرده‌وه‌ و رێنمایی نوێشى له‌و باره‌یه‌وه‌ ده‌ركرد.

ئه‌مڕۆ چوارشه‌ممه‌ 3ى ته‌مموز، كۆمسیۆنى باڵاى سه‌ربه‌خۆى هه‌ڵبژاردنه‌كانى عێراق رایگه‌یاند، “له‌ سبه‌ى پێنجشه‌ممه‌وه‌ تاوه‌كو 15ى ته‌مموز، حزب و هاوپه‌یمانى و كاندیده‌ تاكه‌ كه‌سیه‌كان ده‌توانن خۆیان تۆمار بكه‌ن به‌مه‌به‌ستى به‌شداریكردن له‌ خولى شه‌شه‌مى په‌رله‌مانى كوردستان”.

هاوكات، كۆمسیۆن هه‌موارى تۆمار و پەسەندكردنی لیستی كاندیدەكانی به‌په‌سه‌ندكراوى بڵاوكرده‌وه‌ و به‌پێى هه‌مواره‌كه‌، “ئەو حزب و هاوپەیمانيەتییانەی كە پیشتر و لەماوەی 13 بۆ 31ی ئازارى 2024 لیستی كاندیدەكانیان پێشكەش كردووە، ئەگەر گۆڕانكاری تێدا نەكەن، لیستەكانیان كارپێكراوە، ئەمە لەگەڵ مافە داراییەكانی خۆ تۆماركردنیان”.

هه‌ر به‌پێى هه‌مواره‌كه‌، “ئەگەر یەكێك لەو حزب یان هاوپەیمانێتیی یاخود كاندیدە تاكەكەسییانە بیانەوێت لە پرۆسەی هەڵبژاردن بكشێنەوە، دەبێت داواكاری كشانەوە پێشكەشی كۆمسیۆن بكەن”.

به‌پێى مه‌رسومێكى هه‌رێمى كه‌ له‌لایه‌ن نێچیرڤان بارزانى، سه‌رۆكى هه‌رێمى كوردستان ده‌رچووه‌ بڕیاره‌ رۆژى 19ى تشرینى یه‌كه‌م، هه‌ڵبژاردنى خولى شه‌شه‌مى په‌رله‌مانى كوردستان به‌ڕێوه‌بچێت. هه‌ڵبژاردنه‌كه‌ دابه‌شبووه‌ به‌سه‌ر چوار بازنه‌ى هه‌ولێر و سلێمانى و هه‌ڵه‌بجه‌ و دهۆكدا و كاندید و لیسته‌كان كێبڕكێ ده‌كه‌ن بۆ به‌ده‌ستهێنانى 100 كورسى په‌رله‌مانى كوردستان.