سەرجەم یانە شەوانەکانی بەغدا دادەخرێت

SNN

لە بڕیارێکی وەزارەتی ناوخۆی عێراقدا، ئاماژە بەوە کراوە سەرجەم یانە شەوانەکانی بەغدا دادەخرێت بە تایبەتی ئەو یانە شەوانانەی کە رێگەپێدانی فەرمیان نییە و ئەو یانە شەوانانەشی کە کچان تێیدا کاردەکەن.

بڵاوبوونەوەی ئەم هەواڵە دەنگدانەوەیەکی زۆری بەدوای خۆیدا هێنا لە تۆڕەکۆمەڵایەتییەکان و بەشێک لە هاووڵاتیان و نووسەران، ئاماژە بەوە دەکەن کە ئەمە بەرتەسکردنەوەی ئازادی تاکەکەسی و داخستنی ئەو شوێنانەش گە هاووڵاتیان کاتی خۆیانی تێدا بەسەردەبەن.

وەزارەتی ناوخۆی عێراقیش، لە روونکردنەوەیەکدا ئاماژە بەوە دەکات، کە ئێمە تەنیا ئەو یانە و شوێنی مەیخواردنەوانە دەکەینە ئامانج کە مۆڵەتی کاریان نییە و کچیانیش تێدا کار دەکەن، چونکە بەشێک لەو کچ و ژنانە لەلایەن باندەکانی بازرگانیکردن بە مرۆڤەوە لەیانە شەوانەکاندا بەکاردەهێندرێن.

شایەنی ئاماژەپێکردنە، ئەمە جاری یەکەم نییە کە مەیخانە و یانە شەوانەکانی بەغدا دادەخرێت، بەڵکو لە بەشێک لە ناوچەکانی بەغدا و بە تایبەت کەڕادە، هاووڵاتیان چەندینجار هەڵیانکوتاوەتە سەر یانە شەوانەکان و دایانخستووە.