بۆ هاوتاکردنی مووچەی خاوەنپێداویستییە تایبەتەکان شاندێکی هەرێم سەردانی بەغدا دەکات

SNN

هەروەک مووچەی خانەنشینانی هەرێم، شاندێکی حکومەتی هەرێم کوردستان هەفتەی داهاتوو سەردانی بەغدا دەکات بەمەبەستی هاوتاکردنی مووچەی خاوەنپێداویستییە تایبەتەکان و کورتەباڵاکان.

عومەر جەبار، سەرۆکى کۆمەڵەى کورتەباڵاکانى کوردستان لە کۆنگرەیەکی رۆژنامەوانیدا رایگەیاند، بڕیارە هەفتەى داهاتوو شاندێکى هەرێمى کوردستان بەمەبەستى هاوتاکردنى مووچەى خاوەنپێداویستییە تایبەتەکان و کورتەباڵاکان لەگەڵ عێراق، سەردانى بەغدا بکات.

ئاماژەی بەوەکردووە، “لەکۆبوونەوەى رۆژى چوارشەممەى رابردووى ئەنجوومەنى وەزیران بڕیاردراوە، شاندێک بەسەرۆکایەتیى وەزیرى کار و کاروبارى کۆمەڵایەتى سەردانى بەغدا بکات بە مەبەستى هاوتاکردنى مووچەى خاوەنپێداویستییە تایبەتەکان و کورتەباڵاکان لەگەڵ هاوتاکانیان لە حکومەتى فیدراڵ“.

ئەوەشیخستە روو، “شاندەکە داواى هاوتاکردنى مووچەکانیان دەکەن و بڕیارە لەگەڵ محەمەد شیاع سودانى، سەرۆکوەزیران، وەزیرى دارایی و وەزیرى کار و کاروبارى کۆمەڵایەتیى فیدراڵ کۆببنەوە“.

ئەمە لە کاتێکدایە، دادگای فیدراڵی عێراق بڕیاری هاوتاکردنی مووچەی خانەنشینانی هەرێمی دەرکرد، هاوکات حکومەتى هەرێمى کوردستان لیستى مووچەى خانەنشینانى بۆ مانگی حەوت هاوشێوەى هاوتاکانیان لە عێراق ئامادەکردووە و ئەگەر بڕیارى هاوتاکردنى مووچەى خانەنشینان جێبەجێبکرێت، ئەوا کەمترین مووچەى خانەنشینان لە 220 هەزار دینارەوە دەکرێتە 600 هەزار دینار.