وتەبێژی كۆمیسیۆن بۆ SNN: هیچ بڕیارێك نییە بۆ درێژكردنەوەی وادەی تۆماركردنی لیستی كاندیدان

SNN-عەلی حەمە سەعید

وتەبێژی كۆمسیۆنی باڵای سەربەخۆی هەڵبژاردنەكانی عێراق ئاماژە بەوەدەكات، بڕیاری درێژكردنەوەی وادەی تۆماری لیستی كاندیدی سەربەخۆ و لایەنە سیاسییەكان تەنها لەدەستەڵاتی ئەنجومەنی كۆمیسیاراندایە و ئەمڕۆ كاتژمێر دووی پاش نیوەڕۆ كۆتایی بەو وادەیە دێت و هیچ بڕیارێكیش نییە بۆ درێژكردنەوەی وادەكە.

جومانە غەلای، وتەبێژی كۆمسیۆنی باڵای سەربەخۆی هەڵبژاردنەكانی عێراق بە SNNی ڕاگەیاند: ئەمڕۆ كۆتا وادەیە بۆ تۆماركردنی لیستی كاندیدان بۆ هەڵبژاردنی پەرلەمانی كوردستان و تا كۆتایی دەوامی فەرمی ئەمڕۆ دەرفەت هەیە بۆ تۆماركردنی لیستی كاندیدان بۆ پڕۆسەی هەڵبژاردنی پەرلەمانی كوردستان.

ئاماژەی بەوەشكرد، تەنها ئەنجومەنی كۆمسیاران لە دەسەڵاتیاندا هەیە وادەی تۆماركردنی لیستی كاندیدان درێژبكاتەوە، بەڵام تا ئێستا هیچ بڕیارێكی نوێ نییە بۆ درێژكردنەوەی وادەكە و لە كاتژمێر دووی پاشی نیوەڕۆی ئەمڕۆ ئەو وادەیی  پێشتر بڕیاری لەسەر درابوو كۆتایی دێت.

وتەكانی ئەو بەرپرسەی كۆمیسیۆنی باڵای سەربەخۆی هەڵبژاردنەكان لەكاتێكدایە كە وابڕیارە لە 20/10/2024 پرۆسەی هەڵبژاردن بۆ خولی شەشەمی پەرلەمانی كوردستان بەڕێوەبچێت، هەرێمی كوردستانیش كراوە بە چوار بازنەی هەڵبژاردنەوە كە بریتین لە بازنەكانی هەولێر، سلێمانی، هەڵەبجە و دهۆك، هاوكات بۆ ئەم هەڵبژاردنە ژمارەی كوردسییەكانی پەرلەمان لە 111 كورسییەوە بۆ 100 كورسی كەمكراوەتەوە لەو ژمارەیەش پێنج كورسییان بۆ كۆتای كەمینەكان تەرخانكراوە.