تەقینەوەیەک لە ئیسرائیل کوژراو و برینداری لێکەوتەوە
SNN
بەرەبەیانی ئەمڕۆ تەقینەوەیەک لە تەلئەبیبی پایتەختی ئیسرائیل کوژرانی کەسێک و برینداربوونی هەشت کەسی لێکەوتەوە.
سوپای ئیسرائیل رایگەیاند، لێکۆڵینەوەکانیان لەبارەی تەقینەوەیەک لە تەلئەبیب بەردەوامە کە پێدەچێت لە رێگەی درۆنی بۆمبڕێژکراوەوە ئەنجام درابێت.
هاوکات میدیاکانی ئەو وڵاتە بڵاویانکردەوە، تەقینەوەکە باڵەخانەیەکی کردووەتە ئامانج و بەهۆیەوە کەسێک کوژراوە و هەشت کەسیش برینداربوون.
هێرشەکە دوای ئەوە دێت کە ئیسرائیل کوژرانی فەرماندەیەکی باڵای حزبوڵای لە باشووری لوبنان راگەیاند.
هاوکات حوسیەکانی یەمەن بڵاویان کردەوە، بەم نزیکانە وردەکاری هێرشێکی درۆنی بۆ سەر تەلئەبیب بڵاودەکەنەوە.
دوای دەستپێکردنی شەڕی نێوان ئیسرائیل و فەلەستینیەکان وەک پاڵپشتییەک بۆ غەززە هەریەک لە حزبوڵای لوبنان و حوسیەکانی یەمەن زنجیرەیەک هێرشیان لە دژی ئیسرائیل ئەنجامداوە.
