دۆناڵد ترەمپ: شکۆ و خۆشگوزەرانی بۆ ئەمریکا دەگێڕینەوە

SNN

دۆناڵد ترەمپ کە بە فەرمی قبوڵیکرد ببێتە کاندیدی کۆمارییەکان لە هەڵبژاردنی سەرۆکایەتی ئەمریکا بەڵێنیدا چوار ساڵی داهاتوو بکاتەوە بە چوار ساڵی هەڵسانەوە و گەڕاندنەوەی شکۆ بۆ ئەمریکا و باسی لەوەشکرد، کۆتایی بە سەرجەم شەڕ و قەیرانە نێودەوڵەتیەکان دەهێنێت.

لە کۆتا رۆژی کۆنگرەی کۆمارییەکان دۆناڵد ترەمپ قەبوڵی کرد کە ببێتە کاندید بۆ هەڵبژاردنی سەرۆکایەتی و لە وتارێکدا کە 93 خولەکی خایاند، رایگەیاند: “پێکەوە سەردەمێکی نوێی پڕ لە ئاسایش، خۆشگوزەرانی و ئازادی بۆ هاووڵاتیان دەخوڵقێنین”.

وتیشی: چوار ساڵی داهاتوو دەبێتە شکۆدارترین سەردەمی ئەمریکا و پێکەوە ناکۆکیەکان چارەسەر دەکەن و کەلێنە ناوخۆییەکان پڕ دەکەنەوە و جەختی کردەوە، “کە ئێمە وەک خەڵکی ئەمریکا بڕوای هاوبەش و چارەنوسی هاوبەشمان هەیە و پێکەوە بەستراوینەوە، یان پێکەوە هەڵدەستینەوە، یان تووشی ترازان و هەڵوەشانەوە دەبین”.

باسی لەوەشکرد، دەمەوێت ببمە سەرۆکی هەموو ئەمریکا نەک نیوەی ئەمریکا و بەڵێنی دا لە سەر ئاستی نێودەوڵەتیش کۆتایی بەشەڕەکان بهێنێت و وتی: “ئەگەر من سەرۆک بوومایە هیچکام لە شەڕەکانی ئوکرانیا و غەززە روویان نەدەدا و بە یەک تەلەفون شەڕەکانم رادەگرت”.

ترەمپ لە وتارەکەیدا بە وردی باسی لەو هێرشە کرد کە هەفتەی رابردوو کرایە سەری و بەهۆیەوە برینداربوو.وتی ئەگەر بە رێکەوت سەری نەسوڕاندایە، فیشەکەکە ئامانجەکەی پێکابوو، ئێستا لێرەنەدەبوو.

لە هێرشەکەدا کە لەکاتی وتاری ترەمپ لە گردبوونەوەیەک لە پەنسیلڤانیا ئەنجامدرا، هێرشبەرەکە و یەکێک لە ئامادەبووانی گردبوونەوەکە کوژران و دوو کەسی دیکەش برینداربوون.