لە SNNەوە زانیاری لەسەر یەكەم و دووەم و سێیەمی خوێندکارانی پۆلی 12ی ئامادەیی بزانە
تاقیکردنەوەی خوێندکاران
SNN-عەلی حەمە سەعید
وابڕیارە ئێوارەی ئەمڕۆ لە كۆنگرەیەكی ڕۆژنامەوانیدا ئەنجامی خولی یەكەمی دەرچووانی پۆلی 12ی ئامادەیی بەهەردوو بەشی زانستی و وێژەیی ڕابگەیەندرێت، بەپرسێكی وەزارەتی پەروەردەش ئاشكرایدەكات كە یەكەم و دووەم و سێیەم لە هەردوو بەشی وێژەیی و زانستی لە سنوری پارێزگای سلێمانی و هەڵەبجەن.
بەگوێرەی ئەو زانیارییانەی كە لەبەرپرسێكی وەزارەتی پەروەردە بەSNN دراون ئەوەخراوەتەڕوو، بەگوێرەی ئەو ئەنجامانەی بەدەستهاتووە ئەمساڵ خوێندكارانی قوتابخانەكانی سنوری هەردوو پارێزگای سلێمانی و هەڵەبجە و ئیدارەكانی گەرمیان و ڕاپەڕین ئەنجامێكی زۆر باشیان بەدەستهێناوە بەجۆرێك یەكەم دووەم و سێیەم لەهەردوو بەشی زانستی و وێژەیی لە سنوری پارێزگاكانی سلێمانی و هەڵەبجە و ئیدارەكانی گەرمیان و ڕاپەڕینن.
ئاماژەی بەوەشكرد، سەرەڕای ئەوەی لەهەردوو پارێزگای هەولێر و دهۆك هیچ بایكۆتێكی ناوەندەكانی خوێندن نەبووە لەمساڵدا بەڵام لە هەردوو پارێزگای هەولێر و دهۆك ئەنجامەكان لە ئاست چاوەڕوانی بەرپرسانی پەروەردەی ئەو دوو سنورە نەبووە، چونكە بەگوێرەی ئەنجامەكان یەكەم و دووەم و سێیەم لە هەردوو بەشی وێژەیی لە سنوری قوتابخانەكانی سلێمانین، هاوكات دووەمێكی دوبارەش لە سنوری پارێزگای هەڵەبجەیە بەهەمانشێوە لە سنوری ئیدارەی ڕاپەڕین و گەرمیانیش دووەمی دووبارە هەیە لەهەردوو بەشی زانستی و وێژەیی.
ئەوەش لەكاتێكدایە كە وابڕیارە كاتژمێر 8:00ی ئێوارەی ئەمڕۆ لە كۆنگرەیەكی ڕۆژنامەوانیدا بە ئامادەبوونی وەزیری پەروەردە ئەنجامی تاقیكردنەوەكانی پۆلی 12 بەهەردوو بەشی وێژەیی و زانسی ڕادەگەیەندرێت.
