“كۆتایی ژیانى سیاسى بایدن” راگه‌یه‌نرا
جۆ بایدن، سه‌رۆكى ئه‌مریكا | فۆتۆ: AFP
SNN
رۆژنامه‌ى گاردیانى به‌ریتانى له نوێترین راپۆرتیدا كۆتایی ته‌مه‌نى سیاسى سه‌رۆكى ئێستاى ئه‌مریكاى راگه‌یاند و ده‌ڵێت: كۆتایی ته‌مه‌نى سیاسى جۆو بایدن به كاره‌سات كۆتایی هات.
شه‌وى رابردوو یه‌كشه‌ممه، جۆو بایدن، سه‌رۆكى ئه‌مریكا نامه‌ى كشانه‌وه‌ى خۆى له كێبڕكێ هه‌ڵبژاردنى سه‌رۆكایه‌تى ئه‌مریكا وه‌ك كاندیدى دیموكراته‌كان پێشكه‌ش كرد و پێشنیارى كرد كه‌مالا هاریسى جێگرى ببێته كاندیدى دیموكراته‌كان.
به‌ره‌به‌یانى ئه‌مڕۆ دووشه‌ممه 22ى ته‌مموز، رۆژنامه‌ى گاردیانى به‌ریتانى له‌باره‌ى كشانه‌وه‌ى بایدن راپۆرتێكى بڵاوكرده‌وه كه تێیدا هاتووه، “جۆو بایدن له ساڵى 1972 هاته نێو دنیاى سیاسه‌ت و بوه به‌ته‌مه‌نترین سه‌رۆك له مێژووى ئه‌مریكادا، پاشان پارته‌كه‌ى كوده‌تاى سپى به‌سه‌ردا كرد و ناچارى كرد له كێبڕكێى دووباره وه‌رگرتنه‌وه‌ى پۆستى سه‌رۆكایه‌تى ئه‌مریكا بكشێته‌وه”.
به‌پێى راپۆرته‌كه‌ى گاردیان، “ژیانى سیاسى جۆو بایدن به كاره‌سات كۆتایی هات. ئه‌مه‌ش له ئه‌نجامى به دروستى مامه‌ڵه نه‌كردنى له‌گه‌ڵ چه‌ندین دۆسیه كه گرنگترینیان بریتیه له هه‌ڵاوسانى ئابوورى، شه‌ڕى ئیسرائیل و غه‌ززه و شه‌ڕى ئۆكرانیا”.
گاردیان جه‌ختى له‌سه‌ر ئه‌وه‌شكردووه‌ته‌وه، “هه‌ڵكشانى ته‌مه‌ن هۆكارى سه‌ره‌كى ئه‌و كاره‌ساته‌یه كه به‌سه‌ر سه‌رۆكى ئه‌مریكا هاتووه”.
