لە نیپاڵ فڕۆکەیەک بە 19 سەرنشینەوە کەوتە خوارەوە
SNN
بەرەبەیانی ئەمڕۆ فڕۆکەیەکی نیپاڵی کە 19 سەرنشینی هەڵگرتبوو کەوتە خوارەوە، تەرمی 18 کەسیان دۆزراوەتەوە و فڕۆکەوانەکەش بە برینداری گەیەنراوەتە نەخۆشخانە.
دان بەهادور کارکی، وتەبێژی پۆلیسی نیپاڵ بە ئاژانسی هەواڵی فرانس پرێسی ڕاگەیاندووە، بەرەبەیانی ئەمڕۆ چوارشەممە 24ی تەمموز، لە نیپاڵ فڕۆکەیەک لە کاتی هەڵفڕینی بەرەو کاتماندۆ پایتەختی وڵاتەکە بە 19 سەرنشینەوە کەوتووەتە خوارەوە.
ئاماژەی بەوەکردووە، فڕۆکە سەر بە “هێڵی ئاسمانی ساوریا” بووە و تیمەکانی ئاگرکوژێنەوە و پۆلیس دەستبەجێ گەیشتوونەتە شوێنی رووداوەکە، لەو 19 کەسە تەنها فڕۆکەوانەکە رزگاری بووە و بە برینداری گەیەنراوەتە نەخۆشخانە تاکوو چارەسەری پێویست وەربگرێت.
پرێمناس تاکور، گوتەبێژی فڕۆکەخانەکە دەڵێت: “19 سەرنشین لەناو فڕۆکەکەدا بوون، کە لە دوو تیمی فڕۆکەوانی و 17 کەس لە کارمەندانی هێڵی ئاسمانی ساوریا پێکهاتوون”.
