لە سبەینێوە خانەنشینان دەتوانن فۆڕمی پێدانی زەوی وەربگرن

SNN-عەلی حەمە سەعید

وابڕیارە سبەی دووشەممە لەڕێگەی بانكەكانەوە دەستبكرێت بە پێدانی فۆڕی دابەشكردنی زەوی بەسەر فەرمانبەرانی خانەنشینكراو، فۆڕمەكەش تەنها ئەو خانەنشینانە دەگرێتەوە كە لە ژیاندا ماون، هاوكات ئەو خانەنشینانەشی كە سود مەند بوون لە پێدانی زەوی ناتوانن فۆڕمەكە پڕبكەنەوە.

بەگوێرەی بەدواداچوونەكانی SNNلە سبەی دووشەممە 29/7/2024 لەسەرجەم بانكەكانی شاروشارۆچكەكان، دەستدەكرێت بە پێدانی فۆڕمی دابەشكردنی زەوی بەسەر فەرمانبەراندا، بۆ ئەومەبەستەش دەبێت كەسی خانەنشینكراو بۆ خۆی لە ژیاندا مابێت و ناسنامەی خانەنشینییەكەی لەگەڵ خۆیدا بەرێت بۆ ئەو بانكەی كە مووچەی خانەنشینی لێوەر دەگرێت پاشان دەتوانێت فۆڕمەكەی پێبدرێت.

ئاماژەی بەوەشكرد، ئەو خانەنشینانەی كە لە ژیاندا نەماون و تەنها وارسیان هەیە، ناتوانن سودمەند ببن لە وەرگرتنی زەوی، هاوكات سەرجەم خانەنشینان كە لە ژیاندا ماون بە بێ‌ جیاوازی دەتوانن فۆڕمەكە وەربگرن بە خانەنشینانی سەربازیشەوە بەمەرجێك پێشتر سودمەند نەبووبێت لە وەرگرتنی زەوی.

هەر لە زانیارییەكانی SNNئەوەشهاتووە، لەدوای پێدانی فۆڕمەكان و پاشان گەڕاندەوەیان بۆلایەنی پەیوەندیدار، هاوشێوەی ئەو فەرمانبەرانەی كە سودمەند دەبن لە وەرگرتنی زەوی، لیژنەیەكی تایبەت دەستدەكەن بە پێداچوونەوە و وردبینی كردنی فۆڕمەكان و هەر خانەنشینێك ئەو مەرجانەی تێدا نەبێت كە لەلایەن وەزارەتی دارایی و ئابورییەوە دیاری كراوە فۆڕمەكەی دووردەخرێتەوە لە پێدانی زەوی.

هاوکات، بەگوێرەى داتاى بەڕێوەبەرایەتیى گشتیى خانەنشینى، نزیکەى 260 هەزار خانەنشین لەهەرێمى کوردستاندا هەن.