خانەنشینانی عێراق مووچەی مانگی 8 بە زیادکراوی وەردەگرن
پارەی عێراقی
SNN
وەزارەتی دارایی عێراق رایگەیاند، رێکارەکانی مووچەی مانگی ئابی خانەنشینان تەواو بووە و رەوانەی بانکەکان کراوە و مووچەکانیان بە زیادکراوی وەردەگرن.
ئەمڕۆ پێنجشەممە 1ی ئاب، حوسام عەبدولستار، بریکاری دەستەی گشتیی خانەنشینی عێراق رایگەیاند، بەردەوامن لە جێبەجێکردنی پلانەکانی دەستەی خانەنشینان بۆ دابەشکردنی مووچەکانیان لەسەرەتای هەموو مانگێکدا، کە پێش هەموو وەزارەتەکانی مووچەکانیان دابەشدەکرێت.
ئاشکرایکردووە، لە ئێستادا دەستەی خانەنشینی رێکارەکانی زیادکردنی مووچەی خانەنشینانی تەواو کردووە و رەوانەی بانکەکانی کردووە بۆ دابەشکردنی مووچەی مانگی ئابی ئەمساڵ بە زیادکراوی، هاوکات بە کورتە نامە ئاگاداری خانەنشینان دەکرێتەوە تاوەکو مووچەکانیان وەربگرن.
روونیکردووەتەوە، یارمەتییەکانی کۆتایی خزمەت لە چوارچێوەی پلانی مانگی ئاب بۆ ئەو فەرمانبەرانە خەرجدەکرێت کە خانەنشین دەکرێن ئەوەش دوای 48 کاتژمێر لە وەرگرتنی یەکەم مووچەی خانەنشینی.
ئەمە دوای ئەوەهات، 10ـی حوزەیرانی ئەمساڵ، ئەنجومەنی وەزیرانی عێراق دەنگی دا لەسەر زیادکردنی مووچەی خانەنشینانی عێراق و بەپێی ئەو بڕیارە بڕی 150 هەزار دینار بۆ مووچەکانیان زیاد دەکرێت.
ئەمە لە کاتێکدایە، هێشتا مووچەخۆرانی هەرێم مووچەی مانگی حەوتیان وەرنەگرتووە و لیستەکەیان لە بەغدا لە وردبینیدایە، بە گوێرە زانیارییەکانی سیپان شێروانی، ئەندامی پەرلەمانی عێراق ڕایگهیاندووە، ئەم مانگە زووتر لیستی مووچە نێردراوە و هیچ کێشەیەکی تیادا نەبووە و لەلایەن دیوانی چاودێری هەرێم و عێراق لیستەکان وردبینیان بۆ بکراوە و هیچ کێشەیەکیان نەبووە.
وتیشی:”هەفتەی داهاتوو مووچەی فەرمانبەرانی شارستانی و پێشمەرگە و خانەنشینان تەمویل دەکرێت و ئەگەری هەیە تەمویل کردنی مووچە بە چەند قۆناغێکی خێرا و یەک لەدوای یەک بێت”.
هاوکات، خانەنشینانی هەرێم بە هەمان شێوەی خانەنشینانی عێراق و بە بڕیاری دادگای فیدراڵی عێراق مووچەکانیان هاوتای بەغدا دەکرێت، بەڵام تا ئێستا نازانرێت بۆ مانگی حەوت مووچەکانیان بە هاوتاکراوی وەردەگرن یاخود نا.
