“تا ئەمڕۆ حکومەتی هەرێم ئامادەنییە لیستی مووچەخۆران بداتە بەغدا بۆ تەوتین، بەڵکو فشار دەکات هەژماری من جێگرەوە بێت”

SNN

پەرلەمانتارێكی كورد دەڵێت، وەزیری دارایی عێراق بۆ بە بانكیكردن (توطین)ی مووچەی فەرمانبەرانی هەرێم لە بانکەكانی رەشید و رافیدەین و TBI چاوەڕوانی وەڵامە.

سۆران عومەر، ئەندامی ئەنجومەنی نوێنەرانی عێراق رایگەیاند، بۆ بەدواداچوونی جێبەجێکردنی بڕیاری دادگای فیدراڵی تایبەت بە تەوتینی مووچەی فەرمانبەرانی هەرێمی کوردستان، بە نووسراوی ژمارە (780/د لە 2024/6/3) پرسیارم لە وەزیری دارایی عێراق کرد چییان کردووە بۆ جێبەجێکردنی بڕیارەكەی دادگای فیدراڵی.

وتیشی، “وەزیری دارایی عێراق بە نووسراوی ژمارە (5779 لە 2024/7/23) ئاماژە بەوە دەکات لە 2024/4/7 بە نووسراوی ژمارە (9429) داوای زانیاریی فەرمانبەرانی هەرێمیان کردووە بۆ تەوتینی مووچەکانیان لە بانکی رەشید و رافیدەین و TBI و، چاوەڕوانی وەڵامی حکومەتی هەرێمن”.

سۆران عومەر باسی لەوەشكرد، “تا ئەمڕۆ حکومەتی هەرێم ئامادەنییە لیستەکان بدات بۆ تەوتین و دەستی بە فشار کردووە لەسەر فەرمانبەران تاکو هەژماری من لە بانکی ئەهلی پڕبکەنەوە”.

دووپاتیشیكردەوە، دوای ئەم وەڵامەی وەزیری دارایی فیدراڵ ئاشکرایە حکومەتی هەرێم پاش 112 رۆژ لە داواکردنی زانیاریی مووچەخۆران ئامادەنیە تەوتین بكات بەهۆی ئەوەی دەیەوێت جڵەوی پارەی مووچە لای خۆی بێت و خەریکی فشاری نایاساییە لەسەر مووچەخۆران بۆ پڕکردنەوەی فۆڕمی هەژماری من.”

ئەو پەرلەمانتارە ئاماژەی بەوەشكرد، لەدوای ئەم بێ وەڵامییەی حکومەتی هەرێم بۆ جێبەجێکردنی بڕیاری دادگای فیدراڵی هەنگاوی دی دەگرینەبەر.